-
-
-
-
मुगु । गमगढीमा सञ्चालन हुने जिपहरूले यात्रुबाट ९ किमिको ५ सय रुपैयाँ भाडा असुल्ने गरेका छन् ।
गमगढी बजारदेखि ताल्चा विमानस्थलसम्मको करिब ९ किमिमा सञ्चालन हुने जिपले महँगो भाडा असुलेपछि सर्वसाधारण मर्कामा परेका हुन् ।
छायानाथ रारा यातायात व्यवसायी संघले उक्त खण्डको गाडी भाडा सय रुपैयाँ कायम गरे पनि व्यवसायीले भने मनोमानी भाडा असुली गरिरहेका छन् ।
यहाँ दर्जन बढी जिप सञ्चालनमा छन् । मुगुमा डिजेल प्रतिलिटर १२० रुपैयाँसम्म पर्ने भएकाले भाडा बढी लिएको व्यवसायीहरूको भनाइ छ ।
छोटो रुट भएकाले पटक–पटक व्यवसायीलाई भाडा घटाउन अनुरोध गरे पनि बेवास्ता भएको संघका कोषाध्यक्ष रामभक्त रोकाया बताउँछन् । उनले भाडादरमा एकरूपता ल्याउन समितिले पहल गरिरहेको बताए ।
समितिमा आबद्ध गाडीहरू नभएकाले भाडामा एकरूपता ल्याउन समस्या भएको उनको भनाइ छ । (कान्तिपुर दैनिक)
