मुख्यमन्त्री नपाउने दलमा स‌ंसदीय दलकालागि भीडन्त, सभामुख सर्वसम्मत

प्रकाशित मिति : २०७४ माघ २७ शनिबार


काठमाडौं । प्रदेश नं ७ को मुख्यमन्त्री नहुने पक्कापक्की हुँदा हुँदै पनि एमाले र काँग्रेसका सांसद्हरुमा संसदीय दलको नेता बन्नको लागि होड चलेको छ ।  एमालेका २५, माओवादी केन्द्रका १४, कांग्रेसका १२ र राष्ट्रिय जनता पार्टीका दुई गरी कूल ५३ सांसद रहेको यो प्रदेशमा मुख्यमन्त्रीको लागि बाम गठबन्धनको तर्फबाट नेकपा माओवादीले भाग पारेको छ । 

मुख्यमन्त्री पाउने दल नेकपा माओवादी केन्द्रले अहिले डोटीका सांसद त्रिलोचन भट्टलाई संसदीय दलको नेता चयन गरिसकेको छ । तर, मुख्यमन्त्री नपाउने दलहरुमा भने संसदीय दलको नेताको लागि नै होडबाजी चलिरहेको छ । 

प्रदेशको सबैभन्दा ठूलो दल नेकपा एमालेबाट संसदीय दलको नेताको लागि ४ जना आकांक्षी देखिएका छन् भने काँग्रेसबाट पनि ३ जनाले आकांक्षा देखाएका छन् । यी पार्टीबाट संसदीय दलको नेता चयन भईसकेको छैन । 

नेपाली कांग्रेसबाट संसदीय दलको नेतामा आकांक्षा देखाउनेमा कैलालीबाट निर्वाचित डा रणबहादुर रावल, डडेलधुराका कर्णबहादुर मल्ल र डोटीका भरतबहादुर खड्का छन् । त्यस्तै, एमालेबाट सांसद दीर्घ सोडारी, प्रकाश शाह, पठानसिं बोहरा र तारालामा तामाङ संसदीय दलको नेताको लागि आकांक्षी छन् । 

सभामुखमा थापा निश्चित

उता, प्रदेश नं ७ को सभामुख पदमा बझाङबाट निर्वाचित एमालेका सांसद अर्जुन थापाको विजय निश्चित भएको छ । सभामुखको निर्वाचनको लागि तोकिएको मितिभित्र एउटा मात्रै उम्मेदवारी परेपछि थापा सभामुख बन्ने निश्चित भएको हो । उनको भाग्य नै भन्नुपर्छ एमालेमा पनि सहजै सभामुखको लागि छनौट भएका उनले अरु दलसँग पनि त्यस्तो प्रतिस्पर्धा गर्नु परेन । 

सभामुख निर्वाचनको लागि शनिबार दिउँसो २ बजेदेखि ५ बजेसम्म उम्मेदवारी दर्ताको लागि समय तोकिएको थियो । सभामुखमा थापाको उम्मेदवारीको प्रस्तावकमा एमालेका सांसद दीर्घबहादुर सोडारी र समर्थकमा नेकपा माओवादी केन्द्रका सांसद् त्रिलोचन भट्ट रहेका छन् । यद्यपी औपचारिक रुपमा यसको घोषणा भने यही माघ २९ मा हुने प्रदेशसभाको दोस्रो बैठकबाट गरिनेछ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ