काठमाडौं । अमेरिकाले भेनेजुएलाको राजनीतिमाथि गम्भीर हुने क्रममा थप चेतावनी दिएको छ । अमेरिकाले पछिल्लो पटक आफ्ना नेता तथा कुटनीतिज्ञहरुमाथि आँच आउने गतिविधि गरेमा भेनेजुएलाले कडा मूल्य चुकाउनुपर्ने चेतावनी दिएको हो ।
अमेरिकी सुरक्षा सल्लाहकार जोन बोल्टनले भेनेजुएलाका विपक्षी नेता खुआन गोइदो र अमेरिकी राजनीतिक नेताहरुमाथि आँच आउने कुनै काम गरेमा भेनेजुएलाले नराम्रो परिणाम भोग्नुपर्ने चेतावनी दिएका हुन् ।
उनको चेतावीन अमेरिका लगायत २० भन्दा बढी मुलुकले भेनेजुएलाका विपक्षी नेता खुआन गाइदोलाई अन्तरिम राष्ट्रपतिको मान्यता दिएपछि आएको हो ।
यता, कम्युनिष्ट मुलुकहरुले वर्तमान राष्ट्रपति निकोलस मादुरोलाई नै राष्ट्रपति भन्दै हस्तक्षेप नगर्न अमेरिका लगायतका राष्ट्रलाई चेतावनी दिएका छन् ।
भेनेजुएलामा गत वर्ष भएको राष्ट्रपतीय चुनावमा राष्ट्रपति मादुरोले धाँधली गरेको आरोप विपक्षी नेता गाइदोले लगाउँदै आएका छन् । उनले पुनः चुनाव गराउन अपील गर्दै आएका छन् । त्यस यता भेनेजुएलामा आन्दोलन चर्किँदै आएको छ ।
यसैबीच केही युरोपेली मुलुकले भेनेजुएलामा तत्काल निर्वाचन घोषणा गर्न माग गरेका छन् । स्पेन, जर्मनी, फ्रान्स र बेलायतले आठ दिनभित्र चुनावको मिति घोषणा गर्न माग गरेका हुन् ।
उनीहरुले आठ दिनभित्र निर्वाचन घोषणा नगरे गोइतोलाई नै राष्ट्रपतिको मान्यता दिने चेतावनी दिएका छन् ।
