गण्डकी प्रदेशका नेविसंघका कार्यकर्ताहरु आन्दोलित, सिडिओलाई बुझाए ज्ञापनपत्र

प्रकाशित २०७५ माघ २४ बिहिबार

नवलपुर। नेपाल विद्यार्थी संघ गण्डकी प्रदेशका कार्यकर्ताहरु आन्दोलित भएका छन्। नेविसंघ गण्डकी प्रदेशको आह्वानमा यस क्षेत्रका नेता कार्यकर्ताहरु आन्दोलित भएका हुन्। उनीहरुले सम्वन्धित जिल्लाका सिडिओलाई ज्ञापनपत्र समेत बुझाएका छन्।

नेविसंघ नवलपुरले आफ्ना विद्यार्थी नेताको रिहाइको माग राख्दै बिहिवार प्रमुख जिल्ला अधिकारी दिपक नेपाल मार्फत प्रधानमन्त्रीलाई ज्ञापनपत्र बुझाएको छ। नेबिसंघ नवलपुरका जिल्ला अध्यक्ष राजेश पौडेलको नेतृत्वमा गएको विद्यार्थीहरुको टोलीले ज्ञापनपत्र बुझाएको हो।

ज्ञापनपत्र बुझाइसकेपछी नेबिसंघ गण्डकी प्रदेशले निर्धारण गरेको आन्दोलनको कार्यक्रम बमोजिम जिल्ला सदरमुकाम कावासोतिमा दिउँसो २ बजेदेखि ३ बजेसम्म १ घन्टा चक्काजाम पनि गरेको नेबिसंघ नवलपुरका सचिब सुशील काफ्लेले जानकारी दिए।

आन्दोलनका अन्य कार्यक्रम अन्तर्गत माघ २५ गते जिल्ला प्रसासन कार्यालयमा १ घन्टा धर्ना, २६ गते साँझ मसाल जुलुस, माघ २७ गते झुट्टा मुद्दा खारेजी र बन्दी साथीहरूको बिनासर्त रिहाइको माग गर्दै सरस्वती पुजा गरिने गण्डकी प्रदेश हेर्ने केन्द्रीय उपाध्यक्ष डिल्लीराम सुवेदीले जारी गरेको विज्ञप्तीमा उल्लेख छ।उनले आन्दोलनका कार्यक्रममा सम्पुर्ण विद्यार्थीहरुलाई सहयोग गर्न पनि आग्रह गरेका छन्।

थुनामा राखिएका विद्यार्थी नेता पर्शुराम बस्नेत, बिनय पौडेल, डिफान भुजेलको रिहाई साथै अधिनायकबादी ओली सरकारको बिरोधका लागि आफुहरु आन्दोलनमा जानु परेको पौडेलले बताए।

कार्यक्रममा नेपाली काङ्ग्रेस नवलपुरका नेता महेन्द्र पोख्रेल, भबी भट्टराई, नेपाल तरुण दलका जिल्ला अध्यक्ष सुर्य गुरुङ लगायतका नेताहरु तथा नेबिसंघका नेता र कार्यकर्ताको उपस्थिति रहेको नेबिसंघ नवलपुरका सचिब सुशील काफ्लेले जानकारी दिए।