काठमाडौं । युरोपा लिग फुटबलको क्वार्टरफाइनल पुग्ने टिमहरुको छिनोफानो भएको छ । बिहीबार राति र शुक्रबार बिहान सम्पन्न पिक्वार्टरफाइनलका खेलहरुपछि अन्तिम आठको छिनोफानो भएको हो ।
चेल्सी, भ्यालेन्सिया, नापोली र आर्सनल अन्तिम आठमा पुगेका छन् । चेल्सीले डाइनामो किभलाई पहिलो र दोस्रो लेग गरी समग्रमा ८–० को जित हात पार्यो ।
भ्यालेन्सियाले क्रास्नोदरलाई समग्रमा ३–२ ले हराउँदौ अन्तिम आठमा पुग्यो । दोस्रो लेगको खेल १–१ को बराबरीमा सकिएको थियो ।
नापोलीले खेल ४–३ ले साल्जबर्गमाथि जित हासिल गरेर अन्तिम आठमा ठाउँ बनाएको छ । दोस्रो लेगको खेल ३–१ ले हारे पनि पहिलो लेगमा ३–० ले हासिल गरेको जितको आधारमा समग्रमा ४–३ को नतिजासहित नापोली अन्तिम आठमा पुगेको हो ।
आर्सनलले रेनेसलाई हराएर अन्तिम आठमा पुग्यो । आर्सनल समग्रमा ४–३ ले विजयी भयो । पहिलो लेग ३–१ ले हारेको आर्सनलले दोस्रो लेगमा घरेलु मैदानमा ३–० को जित निकालेको थियो ।
बेनेफिकाले डाइनामो जाग्रेबलाई समग्रमा ३–१ ले हराएर अन्तिम आठमा ठाउँ बनायो । पहिलो लेगमा १–० ले पछि परेको बेनेफिकाले दोस्रो लेगमा ३–० को जित निकालेको थियो ।
फ्रयांकफर्ट पनि अन्तिम आठमा पुगेको छ । फ्रयांकफर्टले इन्टरमिलानलाई १–० ले हराएर अन्तिम आठमा ठाउँ बनाएको हो । पहिलो लेगको खेल गोलरहित बराबरीमा सकिएको थियो ।
स्लाभिया प्रागले सेभियालाई ६–५ ले हराएर अन्तिम आठमा ठाउँ बनायो । स्लाभियाले दोस्रो लगेमा ४–३ को जित पाएको थियो ।
र भिल्लारियल ५–२ को नतिजासहित जेनित सेन्ट पिटर्सबर्गलाई हराएर अन्तिम आठमा पुग्यो । दोस्रो लेग २–१ ले भिल्लारियलले आफ्नो पक्षमा पारेको थियो ।
