काठमाडौं । इंगलिश प्रिमियर लिग फुटबलमा लगातार दोस्रो पटक म्यान्चेस्टर सिटीले उपाधि जितेको छ । लिगको अन्तिम खेलमा आइतबार राति ब्राइटनलाई ४–१ गोल अन्तरले पराजित गर्दै सिटीले उपाधि जितेको हो ।
सिटीलाई ब्राइटनको मैदानमा जिताउन सर्जियो अगुएरो, आइमेरिक लापोर्ते, रियाद महरेज र इल्काये गुन्डोगानले १–१ गोल गरे ।
ग्लेन मुरेले खेलमा ब्राइटनका लागि सुरुआती अग्रता दिलाएका थिए । सिटीले जितसंगै ९८ अंकसहित उपाधि जितेको हो ।
दोस्रो स्थानको लिभरपुलले ९७ अंकसहित उपविजेतामै चित्त बुझायो । लिभरपुलले अन्तिम खेलमा लिभरपुलले वुल्भरह्याम्पटनलाई घरेलु एन्फिल्डको मैदानमा २–० को गोल अन्तरले हरायो ।
लिभरपुललाई जिताउन सादियो मानेले दुवै गोल गरेका थिए । तर यो जितले लिभरपुललाई उपाधि दिलाउन सकेन ।
७२ अंकसहित तेस्रो स्थानमा रहेको चेल्सीले अन्तिम खेलमा लेस्टर सिटीसंग गोलरहित बराबरी खेल्यो ।
चौथो स्थानको टोटनह्यामको ७१ अंक रह्यो । टोटनह्यामले अन्तिम खेलमा घरेलु मैदानमा एभर्टनसंग २–२ गोलको बराबरी खेल्यो ।
पाँचौं स्थानको आर्सनलको ७० अंक भएको छ । आर्सनलले अन्तिम खेलमा बर्नलीलाई ३–१ गोल अन्तरले हरायो ।
निकै उतारचढावम अल्झिएको म्यान्चेस्टर युनाइटेडले अन्तिम खेलमा पनि २–० गोल अन्तरले पराजित हुँदै ६६ अंकसहित छैटौं स्थानमा रह्यो ।
वोल्भस सातौं, एभर्टन आठौं, लेस्टर नवौं, वेष्ट ह्याम दशौं, वाट्फोर्ड ११ औं, क्रिस्ल १२ औं, न्युकासल १३ औं, बर्नमाउथ १४ औं, बर्नली १५ औं, साउथह्याम्पटन १६ औं र ब्राइटन १७ औं मा रहेर अर्को सिजन पनि प्रिमियर लिग नै खेल्न पाउने भयो ।
१८ औं स्थानको कार्डिफ, १९ औं को फुल्हम र पुछारको हडर्सफिल्ड रेलिगेशनमा परेका छन् ।
