जागरण अभियानको सन्देश

प्रमोदहरि गुरागाई, प्रकाशित मिति : २०७६ असार ३ मंगलबार

मञ्जुर छैन
स्वप्निल आँखाहरुलाई
काँडाहरुद्वारा निर्मित पदमार्गहरु ।

फूल फूलाएर
पुतली नचाउने
जाँगरहरुमा जाँगर थप
तसर्थ ,
अनुमती छैन
बाँधहरु निर्माण गर्न
नदी जस्तै वग्ने चेतनाहरुलाई ।

ए , माथि भन्दा माथिका केन्द्रहरु
हेर त , हामी जराहरु तर्फ
चट्टानमा जीवन बाँचीरहेछौं
सहेकाछौं शिशिरका कठाङ्ग्रिने चिसाहरु
भोगेकाछौं
पहिरोले छ्यत्बिछ्यत् घाँऊहरु
तर पनि
चट्टान चिर्दै
मूहान तर्फको यात्रा जारी छ
भरीलो जीवनको
प्रेमील खोजिमा ।

बुझौं ,
सामुहिकताको बिम्ब हो " रुख "
जरा , काण्ड , हाँगा , पात....हरु
छुट्टा छुट्टै होइनन्
हुनै सक्दैनन्
आऊ अंकमाल गरेर
प्रतिबद्धता जाहेर गरौं
ठूलो भूमीका , ठूलै ऐना
सानो भूमीका , सानै ऐना
समुहमै बसेर हेरौं
म मेरो मैलो धुन्छु
तिमी तिम्रो मैलो धोऊ
हिमाल , पहाड , तराई-मधेस
थाली भरि अविर लिएर प्रतिक्षामा छ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ