सप्तकोशीमा अहिलेसम्मकै बहाव उच्च, सबै ५६ ढोका खोलिए

प्रकाशित २०७६ असार २९ आइतबार

सुनसरी । पूर्वी पहाडी क्षेत्रमा वर्षा निरन्तर भएसंगै सप्तकोशीमा अहिलेसम्मकै उच्च बहाव देखिएको छ ।

लगातारको वर्षाले सप्तकोशी नदीमा पानीको बहाव बढ्दै गएकाले सबै ढोका खोलिएको ब्यारेज प्रहरी चौकी कार्यालयका प्रमुख ईश्वर दाहालले जानकारी दिए ।

नदीमा पानी बढ्न थालेपछि एकपछि अर्को ढोका खोल्न ब्यारेजमा २४ सै घण्टा प्राविधिकसहितका कर्मचारी तैनाथ रहेको सहायक प्रहरी निरीक्षक दाहालले बताए ।

नौ लाख क्यूसेक पानी बहने क्षमता रहेको ब्यारेजमा अहिले दुई लाख ९० हजार क्यूसेक पानी बगिरहेको बताइएको छ । हिजो शनिबार तीन लाख १८ हजार ६५० क्यूसेक पानी बगिरहेको थियो ।

यो वर्ष सप्तकोशीमा २४ हजार क्यूसेक पानीबाट अहिले बढ्दै सो क्षमतामा बगिरहेको छ । एक दशकअघि ब्यारेजदेखि माथि सिरान पश्चिम कुशहामा बाँध फुटेको थियो ।

बाँध फुट्दा नेपाल र भारतमा थुप्रै जनधनको क्षति भएकाले अहिले कोशी ब्यारेज र बाँधलाई सुरक्षित राख्न प्राविधिकहरुले विशेष सतर्कता अपनाएका छन् । पुलको बिम छुन लाग्ने अवस्थामा पुलको ढोका खोल्ने गरेको बताइएको छ ।

पानी पर्दै रोकिँदै भइरहेको छ । जल तथा मौसम पूर्वानुमान महाशाखाले आइतबार पनि निरन्तर वर्षा हुने भएकाले सचेत रहन आग्रह गरेको छ ।

वर्षा जारी रहेकाले सप्तकोशीमा पानीको बहाव थप बढ्न सक्ने भन्दै प्रशासनले स्थानीय बासिन्दालाई सचेत गराएको छ ।

बिहार पनि जलमग्न
भारतको बिहार पनि जलमग्न भएको छ । भारी वर्षासंगै सप्तकोशीका सबै ढोका खोलिँदा बाढीले गर्दा बिहार जलमग्न भएको हो ।

बिहार डुबेसंगै सप्तकोशीका ढोका बन्द गर्न दबाब दिएको बुझिएको छ ।

सन्धी अनुसार सप्तकोशीको कोशी ब्यारेज भारतको नियन्त्रणमा भएकाले पनि बिहार डुब्दा ढोका बन्द गर्न दबाब बढेको छ ।

स्रोतका अनुसार तत्काल चार वटा ढोका बन्द गर्ने क्रममा रहेको बुझिएको छ । वर्षामा कमी आएको भन्दै चार वटा ढोका बन्द गर्न लागिएको हो ।