- सुन चाँदी दर
- विनिमय दर
- नेपाली पात्रो
- राशिफल
काठमाडौं । भारतीय क्रिकेट टिमका पूर्व कप्तान महेन्द्र सिंह धोनीले निकै तनाव र सुरक्षा खतरा बढिरहेको अवस्थामा जम्मू–कश्मीरमा तालिम लिएका छन् ।
भारतीय सेनाका लेफ्टिनेन्ट कर्नेल धोनीले शनिबार प्रादेशिक सेनाको १५ दिनको तालिम सकेर दिल्ली फर्किएका हुन् ।
धोनी जुलाई ३० मा प्रादेशिक सेनाको १०६ टीए बटालियनसंग जोडिएका थिए ।
दुई हप्ते तालिमका क्रममा धोनी कश्मीर घाटीका अलग–अलग क्षेत्रमा खटिएका थिए ।
उनले सैन्य सहकर्मीहरुसंग समय बिताउने क्रममा पेट्रोलिङ पनि गरे । उनी उरी तथा अनन्तनाग पनि गए ।
५ अगष्टमा केन्द्र सरकारले जम्मू–कश्मीरबाट अनुच्छेद ३७० तथा धारा ३५–ए लाई हटाएको थियो ।
त्यसपछि जम्मू–कश्मीर र लद्दाखलाई केन्द्र शासित प्रदेश घोषित गरिएको थियो । त्यतिबेला धोनी तालिममा व्यस्त थिए ।
३८ वर्षीय धोनीले विश्वकप एक दिवसीय क्रिकेटपछि क्रिकेटबाट विश्राम लिएर सैन्य तालिममा गएका हुन् ।
उनी वेष्ट इन्डिज पनि गएनन् । भारतले वेष्ट इन्डिजलाई उसको मैदानमा एक दिवसीयमा २–० को जित निकालेको थियो ।
धोनीले तालिमका समयमा फुर्सद निकालेर लद्दाखको सैन्य अस्पतालमा पुग्नुका साथै बिरामी र कुरुवाहरुसंग पनि कुराकानी गरे ।
उनले समय निकालेर स्थानीय बालबालिकासंग क्रिकेट पनि खेले । उनले सैन्य पोशाकमै रहेर क्रिकेट खेलेका हुन् ।