ग्यासको भाउ सरकारले घटायो व्यवसायीले घटाएनन्, उर्दी जारी गर्यो आयल निगमले 

प्रकाशित मिति : २०७६ असोज ८ बुधबार

काठमाडौँ । नेपाल आयल निगमले खाना पकाउने एलपी ग्यासको मूल्य घटाए पनि व्यवसायीहरुले पुरानै मूल्यमा बिक्री गरेपछि निगमले उर्दी नै जारी गरी घटेको मूल्यमा विक्री वितरण गर्न निर्देशन दिएको छ । 

गत असोज ३ गते राति १२ बजेदेखि लागु हुने गरी ग्यासको मुल्यमा २५ रुपैयाँ कम गरे पनि व्यवसायीहरुले मूल्य नघटाई विक्री गरेपछि घटेको मूल्यमा विक्री गर्न निगमले निर्देशन दिएको हो । 

सो अनुसार नभए कार्वाही गर्ने चेतावनी आयल निगमले दिएको छ । 

उपभोक्ताको गुनासो आएपछि निगमले बजार अनुगमन गरेको थियो । अनुगमनका क्रममा पुरानै मूल्यमा बिक्री भएको पाइएको निगमले जनाएको छ । खुद्रा पसलले ग्यासको मूल्य नघटाए निगमले कारबाही गर्ने चेतावनीसहितको विज्ञप्ति सार्वजनिक गरेको छ । 

चाडवर्पका बेला उपभोक्तालाई राहत हुने आशयले मूल्य घटाइएको तर व्यापारीबाट त्यसको कार्यान्वयन नभएको सुन्नमा आएकाले निगमले अनुगमन गरेको निगमका प्रवक्ता वीरेन्द्र गोइतले बताए । 

अन्तर्राष्ट्रिय बजारमा कायम रहेको पेट्रोलियम पदार्थको मूल्यअनुरूप भदौ १५ गते इन्डियन आयल कर्पोरेसनबाट निगमलाई प्राप्त हवाई इन्धन र एलपी ग्यासको नयाँ खरिद मूल्य घटेर आएकाले मूल्य समायोजन गरिएको थियो ।

नेपाल भ्रमण वर्ष सन् २०२० लाई लक्षित गरी निगमले अन्तर्राष्ट्रिय हवाई उठानतर्फको इन्धनको मूल्य पनि घटाएको थियो ।

काठमडौं उपत्यका लगायत अन्य पहाडी क्षेत्रमा प्रतिसिलिन्डर १३ सय ७५ रुपियाँमा बिक्री हुँदै आएको ग्यासलाई अहिले २५ रुपियाँ घटाएपछि अब १३ सय ५० मा झारिएको छ । 

त्यस्तै दाङ, बाँके, बर्दिया, कैलाली र कन्चनपुरमा १३४० रुपैयाँमा बिक्री हुँदै आएको ग्यासलाई १३१५ रुपैयाँमा झारिएको छ । 

अन्य तराई क्षेत्रमा १३५५ मा बिक्री हुँदै आएको ग्यासलाई १३३० रुपैयाँमा झारिएको छ । 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ