बारा। बारा प्रहरीले भन्सार छली गरी नेपाल भित्रयाईएको लाखौ मूल्य बराबरको शर्टिङ्ग सुटिङ्गका कपडा सहित ३ जनालाई सार्वजनिक गरेको छ । जिल्ला प्रहरी कार्यालय बाराले मंगलबार पत्रकार सम्मेलन गर्दै ३३ लाख ९० हजारको शर्टिङ्ग सुटिङ्गका कपडा, पाँच वटा मोटरसाईकलसहित आर्दशकोतवाल गांउपालिका वडा नम्बर ५ निवासी ३४ वर्षिय रामरतन यादव, २९ वर्षिय जयमंगल प्रसाद यादव र ४५ वर्षिय हेमचन्द्र तिवारीलाई सार्वजनिक गरेको हो ।
जिल्ला प्रहरी र ईलाका प्रहरी कार्यालय सिम्रौनगढको संयुक्त प्रहरी टोलीले विशेष सूचनाको आधारमा सिम्रौनगढ नगपालिका वडा नम्बर ६ सानो ईटवाल स्थित मोजाहिर मियाको घरमा कोठा भाडामा लिएर बसेका तीनै जनालाई आईतबार दिउंसो पक्राउ गरिएको बाराका प्रहरी उपरिक्षक विकासराज खनालले बताए ।
भन्सार छलेर मोटरसाइकलहरुमा १२ वटा ठुलो बोरामा लोड गरिएको अवस्थामा र १३ वटा बोरामा घरमा राखिएको अवस्थामा शर्टिङ्ग, सुटिङ्गका कपडा बरामद गरिएको पत्रकार सम्मेलनमा बाराका प्रहरी उपरिक्षक खनालले बताए ।
कपडा सहित बरामद गरिएको पांच वटा मोटरसाईकल र पक्राउ परेका तीनै जनालाई आवश्यक कारवाहीको लागि वीरगन्ज भन्सार कार्यालयलाई बुझाईएको प्रहरीले जनाएको छ ।
