arrow

सिमानामा उभिएर 

logo
लिला अनमोल,
प्रकाशित २०७७ असार १४ आइतबार
lila-anamol.jpg

हो त्यहीँनेर ढल्यो 
मेरो सपनाको महल 
सिमाना बेचेर स्वार्थको माला लगाएपछि 
हो त्यहीँनेर लुटियो 
मेरो देशको अस्मिता  
तिमीले उस्कै घामको उज्यालोमा 
नाचेर छमछमी 
आवश्यकताको परिपूर्ति गर्यौ 
उस्कै लालचको सवारीमा सवार भएर 
सम्पन्नताको भ्रम बाँच्यौ 
मानेर हरपल उस्को तन्नेरी आदेश 
हरेक बाँझो निर्णयमा हस्ताक्षर गर्यौ 
र झुक्याएर पटक पटक मलाई 
स्वतन्त्रताको नाटक रच्यौ 
हो त्यहीँनेर पिल्लिएको छ मेरो देशको आँखा 
मेरो सहनशिलतालाई कमजोर ठानेपछि  
हो त्यहीँनेर पाछिएको छ मेरो देशको मुटु 
आज हाँस्दैन  निसङ्कोच मेरो हिमाल
सिमाना दुखेर मेचीकाली 
लिपुलेक रुँदैछ धर्धरी 
लिम्पियाधुराको शिरमा उम्रिएको  दुबो
अर्कै देशमा हरियो छरिरहेछ 
आज ढुक्कले घुम्दैन मेरो समयको काँटा 
र खोलाको लहरले स्वतन्त्रताको गीत गाउँदैन आज 
हो त्यहीँनेर भत्कियो मेरो एकताको बाँध 
तिमीले साटेर मेरो माटोको सुगन्ध 
उस्कै आँगन सुगन्धित बनायौ 
र खिया पारेर मेरो आशामा 
पराधिनताको धार लगायौ 
जब तिमीले कमजोर ठानेपछि आफूलाई 
उसँग सिद्धान्तको भिख माग्यौ 
र समस्याको समाधान गर्ने बहानामा 
विनाशको पैरो चलायौ 
हो त्यहीँनेर छाम्यो उस्ले मेरो देशको ढुकढुकी 
र नाकाबन्दी गरेर मेरो आबश्यकतालाई 
ठान्यो उस्ले मगन्ते 
त्यहिबेला उस्ले मेरो स्वभिमानमा 
तागतको शालिक ढड्यायो 
र लडाएर एक आपसमा 
अधिकारको नाटक मन्चन गर्यो 
र त यतिबेला ऊ
मेरै आँगनीमा होली खेलँु भन्छ रगतको 
र चुँडालेर सद्भावको डोरी 
ऊ युद्दको बेर्ना उमारुँ भन्छ 
दबाबको कोर्‍राले 
हिर्काएर मेरो देशलाई 
ऊ बनाउँ भन्छ घाइते 
र बिरामी बनाएर मेरो मानसिकता 
आफ्नै शासनको रजाइँ गरुँ भन्छ 
लादेर आफ्ना अरौटेहरु यहीँ 
जबर्जस्त मेरो देशको बनाउन खोज्छ 
र बहन गराएर पदीय जिम्मेवारी 
मलाई उपनिबेशको बनाउन खोज्छ 
तर खबरदार 
ढल्दैन मेरो स्वाभिमान
गल्दैन मेरो विश्वास 
डग्दैन मेरो एकता 
मेरो चन्द्र सूर्यको कसम 
अब म 
आगोमा पानी भएर होइन 
आगोमा आगो भएर दन्कनेछु
भाग सिमानाका फोहोरहरु
म झिल्को भएकी छु
खबरदार
डडाउँछु म छ्यणभरमै  ।।       
 (कबयत्री रेडियो बिराटकी प्रबन्ध निर्देशक हुन्)  
 



लोकप्रिय समाचार
लोकप्रिय समाचार
नयाँ