काठमाडौँ। प्रमुख प्रतिपक्षी दल नेपाली काँग्रेसले संसदमा पेस भएको संविधान संशोधन विधेयक तत्काल अघि बढाउन दबाब दिने भएको छ । काँग्रेस संसदीय दलको आजको बैठकले संविधान संशोधनको विधेयक यथाशीघ्र अघि बढाई तराई–मधेसमा भइरहेको आन्दोलनलाई सम्बोधन गर्न सरकारसँग माग गर्ने निर्णय गरेको छ ।
बैठकले काँग्रेस नेतृत्वको सरकारले व्यवस्थापिका–संसद्मा पेस गरेको संविधान संशोधन र भूकम्पपछिको पुनःनिर्माणसम्बन्धी विधेयक यथाशीघ्र पारित गर्न दबाब दिने निर्णय गरेको सांसद भरत खड्काले जानकारी दिनुभयो । कार्यवाहक सभापति रामचन्द्र पौडेलले शनिबार सत्तापक्ष र मधेस केन्द्रित दलसँग भएका वार्ता र छलफलबारे बैठकलाई जानकारी गराउनुभएको थियो ।
तराई–मधेसको आन्दोलनबाट मुलुकमा भयावह समस्या उत्पन्न भएको भन्दै बैठकले सत्तापक्ष र आन्दोलनरत पक्षलाई गम्भीर र लचकताका साथ वार्ता एवम् सहमतिद्वारा समस्या समाधान गर्न आग्रह गर्ने निर्णय गरेको छ । बैठकले शनिबार राति सप्तरीमा भएको दुई आन्दोलनकारीको मृत्यु र एम्बुलेन्समा भएको आक्रमणप्रति दुःख व्यक्त गर्दै दुवै पक्षलाई संयमित हुन आग्रह गरेको सांसद जगदीशनरसिंह केसीले जानकारी दिनुभयो ।
