नेपालगन्ज । नेपालगन्जको राँझा विमानस्थलमा बृहत् आपत्कालीन पूर्व अभ्यास गरिएको छ । विमानस्थलभित्र जहाज दुर्घटना भएको अवस्थामा विमानस्थल सञ्चालन र आपत्कालीन उद्धारमा सरोकारवालाहरूको सक्रियतालाई व्यवहारिक रूपमै अभ्यास गर्न बृहत् आपत्कालीन पूर्व अभ्यास गरिन्छ ।
फायर फाइटर, सेना, सशस्त्र प्रहरी र जनपथ प्रहरीका उद्धार टोली विमानस्थलमा आएका थिए । एम्बुलेन्स तथा दमकल समेत तयारी अवस्थामा राखी फुल स्केलको आपत्कालीन अभ्यास गरिएको राँझा विमानस्थल नेपालगन्जका प्रमुख प्रेमनाथ ठाकुरले जानकारी दिए ।
पूर्व अभ्यासमा एकाएक विमान दुर्घटना हुन्छ । तत्काल दमकल पुगेर आगो निभाउँछ । सुरक्षाकर्मीले घाइतेहरूको उद्धार गर्छन् र अस्पताल पठाउँछन् । पूर्व अभ्यासको समयमा विमानस्थल बन्द गरिएको थियो ।