कोलम्बो। देशको आर्थिक सङ्कट बिग्रँदै गएपछि श्रीलङ्काभरका चिकित्सकहरूले अस्पतालमा औषधि र अत्यावश्यक आपूर्ति सकिएको बताएका छन्। चाँडै अन्तर्राष्ट्रिय सहयोग नभए स्वास्थ्य विपत्ति हुने डर बढेको छ। 

‘दिनप्रति दिन सामान सकिरहेका छन्। हामी शून्य बिन्दुमा पुग्यौँ भने मलाई थाहा छैन के हुन्छ’, डा. ज्ञानसेकरमले भने। श्रीलङ्काको मेडिकल विशेषज्ञहरूको सङ्घका सचिवसमेत रहेका डा. ज्ञानसेकरमले राजधानी कोलम्बोमा रहेका कुन कुन अस्पतालमा औषधिको कमी छ भनेर सूची तयार गरेका छन्।  ‘हामीसँग मेडिकल ड्रग्स, एनेस्थेटिक औषधि, प्रत्यारोपण, स्टिच सामग्रीको अभाव छ। हामीसँग स्टक लगभग समाप्त छ’, उनले भने।

‘तत्काल राहत नभएसम्म स्वास्थ्य सेवाहरू ध्वस्त हुनेछन्’, उनी भन्छन्। औषधिको आपूर्ति नभए त्यसले गम्भीर परिणाम निम्त्याउने चिकित्सकहरूले चेतावनी दिएका छन्। ‘यति त्यस्तो अवस्था आयो भने हामीले बिरामीको ज्यान जोगाउन सक्नेछैनौँ।

श्रीलङ्का इतिहासमै सबैभन्दा खराब आर्थिक सङ्कटमा फसेको छ। श्रीलङ्काले करिब ८५ प्रतिशत चिकित्सा आपूर्ति आयात गर्दछ। तर, विदेशी मुद्रा सञ्चिति न्यून रहेकाले अत्यावश्यक औषधिहरू अहिले पाउन कठिन छ।

एनेस्थेटिक्समा प्रयोग गरिने एट्राकुरियम दुई महिनाको मात्र स्टक बाँकी छ। अन्य औषधिको आपूर्ति पनि कमी भइरहेको छ।

पेनकिलर फेन्टानिलको स्कट अव दुई हप्तामा सकिँदै छ। विभिन्न तीन प्रकारका यान्टिबायोटिकहरूको स्टक पहिल्यै सकिएको छ। प्रतिस्थापन गरेर अभाव व्यवस्थापन गरेको डा. विजेसुरिया बताउँछन्।

फ्रन्टलाइन चिकित्सकहरू धेरै कम उत्साहित छन्। अभावबारे सार्वजनिक रूपमा सञ्चार माध्यममा उनीहरू खुलेर बोल्न सक्दैनन्। युनियनका प्रतिनिधिहरू र अस्पतालका निर्देशकहरूलाई मात्र सार्वजनिक रूपमा बोल्ने अधिकार छ।

चिकित्सकहरूले बारम्बार समस्या देखाए पनि सुरुमा श्रीलङ्काको सरकारले एक विज्ञप्ति निकालेर नै औषधिहरू सकिएको अस्वीकार गर्‍यो। एक दिनपछि सरकारी सूचना विभागले त्यसलाई सच्याउँदै केही औषधि र उपकरणको अभाव भएको स्वीकार गरेको थियो।

बिबिसीका अनुसार देशभरका अस्पतालहरूलाई जीवन बचाउने औषधि र उपकरणहरूको आवश्यकता छ। आपूर्तिको कमीले उनीहरूलाई गैर–अत्यावश्यक कार्यहरू स्थगित गर्न र  केही उपकरणहरू पुनः प्रयोग गर्न बाध्य पारेको मेडिकल कर्मचारीहरूले गुनासो गरेका छन्।