नयाँ शताब्दीमा राष्ट्रपतिमा दोस्रोपटक निर्वाचित हुने म्याक्रोँ पहिलो
हाम्रा कुरा
प्रकाशित २०७९ वैशाख १२ सोमबार
358
Shares
तस्बिर– फाइल
काठमाडौं । फ्रान्सको राष्ट्रपतिमा पुनः इम्यानुअल म्याक्रोँ निर्वाचित भएका छन् । मुख्य प्रतिद्वन्द्वी म्यारिन ली पेनलाई हराउँदै म्याक्रोँ पुनः निर्वाचित भएका हुन् । म्याक्रोँले अनुमान गरेभन्दा बढी मत ल्याउन सफल भएका छन् ।
म्याक्रोँले ५८.५५ प्रतिशत मत प्राप्त गरेका छन् । जबकि पेनले ४१.४५ प्रतिशत मत प्राप्त गरिन् । उनी अतिदक्षिणपन्थीहरूको सबैभन्दा बढी मत प्राप्त गर्न सफल भइन् ।
चुनावको समयमा दक्षिणपन्थी उम्मेदवार पेनले ईयूविरोधी नीति सार्वजनिक गरेकी थिइन् । म्याक्रोँको विजयको युरोपेली नेताहरूले स्वागत गरेका छन् । ‘हामीले फ्रान्स र युरोपलाई सँगसँगै अगाडि बढाउनेछौँ’, युरोपेली आयोगका अध्यक्ष युर्सुला भोन डेर लियेनले भनिन् ।
फ्रान्समा सन् २००२ पछि पहिलो पटक कुनै पनि राष्ट्रपति दोस्रो पटक चुनिाएका हुन् । यसपालि उनको जितको अन्तर भने कम भएको छ । सन् २०१७ मा उनले ६६.१ प्रतिशत मत ल्याएका थिए । पेनको भागमा ३३.९ प्रतिशत मत परेको थियो ।
म्याक्रोँको विजयले युरोपेली नेताहरूलाई राहत पुगेको बताइएको छ । युक्रेनका राष्ट्रपति भोलोदिमिर जेलेन्स्की र बेलायतका प्रधानमन्त्री बोरिस जोनसनले म्याक्रोँलाई बधाई दिएका छन् ।
