आर्थिक सङ्कटबीच श्रीलङ्कामा औषधिको मूल्यमा ४० प्रतिशत वृद्धि
हाम्रा कुरा
प्रकाशित २०७९ वैशाख १८ आइतबार
397
Shares
फाइल तस्बिर
कोलम्बो। आर्थिक सङ्कटसँग जुधिरहेको श्रीलङ्काले सामान्य रूपमा प्रयोग हुने औषधिको मूल्यमा तीव्र वृद्धि गरेको छ। यो ६ हप्ताको अवधिमा दोस्रो वृद्धि हो। एन्टिबायोटिक्स, निश्चित पेन किलर्स र मुटुसम्बन्धी औषधिको मूल्यमा ४० प्रतिशत वृद्धि गरिएको हो। श्रीलङ्कामा औषधिको चरम अभाव देखिएको छ। आपूर्तिको लागि विदेशमा नै निर्भर गर्नुपर्ने बाध्यता छ।
सरकारले खाद्यान्न र औषधिहरूसहित केही आवश्यक वस्तुहरूको आयातमा प्रतिबन्ध लगाएको थियो। ‘यो सरकारले स्वेच्छाले गरेको निर्णय होइन’, श्रीलङ्काका सञ्चार मन्त्री नालाका गोदाहेवाले भने।
रुपैयाँको अवमूल्यन र अधिकांश औषधि निजी क्षेत्रबाट आयात हुने भएकाले सरकारसँग विकल्प नभएको उनले बताए। मूल्य वृद्धि नगरे गम्भीर अभाव हुन सक्ने उनले बताए। औषधि अभावले तोकिएभन्दा कम औषधि किन्न बाध्य भएको भन्दै स्वास्थ्यकर्मी चिन्तित छन्।
‘अवस्था निकै खराब छ। कहिलेकाहीँ एन्टिबायोटिकहरू पाँच दिनको लागि निर्धारित गरिन्छ। तर, अहिले मेरा ग्राहकले दुई/तीन दिनको लागि मात्र एन्टिबायोटिक मागिरहेका छन्’, कोलम्बोमा फार्मेसी चलाउने रुचिरा हेवावासमले भनिन्।
उच्च मूल्य तिर्न इच्छुक र सक्षम भएकाहरूका लागि पनि केही औषधिहरूको आपूर्ति कम भएकोमा केही चिन्तित छन्। मध्य रत्नपुरा जिल्लामा बस्ने वेलुपिल्लई विग्नेश्वरन विगत एक वर्षदेखि गम्भीर न्यूरोलोजिकल डिसअर्डरबाट पीडित आफ्नी बहिनीका लागि औषधिको ट्याब्लेट खोजिरहेका छन्।
‘हामीले धेरै फार्मेसीहरू खोज्यौँ तर औषधिहरू उपलब्ध छैनन् । डाक्टरहरूले हामीलाई फरक औषधि नखान सल्लाह दिएका छन् । हामी हाम्रा साथीहरूमार्फत भारतबाट औषधि ल्याउँदै छौँ,’ उनले भने ।
