युक्रेनका लागि वार्ता र कूटनीतिक पहल गर्न मोदीको आग्रह

सिन्ह्वा,

प्रकाशित २०७९ वैशाख २१ बुधबार

कोपेनहेगन। भारतका प्रधानमन्त्री नरेन्द्र मोदीले युक्रेनको हालको द्वन्द्व समाधानका लागि वार्ता र कूटनीतिक प्रयास सँगसँगै गर्नुपर्ने बताएका छन्। उनले युक्रेनमा हाल जारी रहेको समस्याको समाधानका लागि वार्ता र कूटनीतिक पहल जरुरी रहेको बताए।

हाल युरोप भ्रमणमा रहेका प्रधानमन्त्री मोदीले मङ्गलवार डेनमार्कका आफ्ना समकक्षी मेट्टे फ्रेडरिक्सनसँगको वार्तापछि सो धारणा राखेका हुन्। डेनमार्कका आफ्ना समकक्षी मेट्टे फ्रेडरिक्सनसँगको वार्तापछि मङ्गलवार आयोजना गरिएको संयुक्त पत्रकार सम्मेलनमा उनले भने– युक्रेनको सङ्कट समाधान गर्न वार्ताका साथै कूटनीतिक प्रयासहरूलाई गति दिनुपर्छ, यही माध्यमबाट नै समस्या समाधान हुनेछ।

भारत युक्रेनमा शान्ति चाहेको भन्दै हाल जारी रहेका आक्रमणहरूलाई रोकेर अविलम्ब कूटनीतिक वार्ता थाल्नुपर्ने भारतको धारणा रहेको पनि उनले बताए। प्रधानमन्त्री मोदी भारतको प्रधानमन्त्रीका रूपमा पहिलो पटक डेनमार्कको भ्रमण गरेको पनि उनले बताएका थिए।