गगन विरोधीलाई धनराजको प्रश्न –गगन नभएको भए तपाईहरुले एमसीसी पास गर्न सक्नुहुन्थ्यो ?

हाम्रा कुरा

प्रकाशित २०७९ असार ३२ शनिबार

काठमाडौं । नेपाली कांग्रेसका उपसभापति धनराज गुरुङले नेताहरु वादी र प्रतिवादीजस्तो गरेर बोल्नु पर्दा चर्को असन्तुष्टि जनाएका छन् । कांग्रेस केन्द्रीय कार्यसमितिको वीपीनगर, सानेपामा शनिबार बसेको बैठकमा उपसभापति गुरुङले नेताहरुबीच आरोप प्रत्यारोप चलेपछि उनले असन्तुष्टि जनाएका हुन् ।

सभापति शेरबहादुर देउवा पक्षीय केन्द्रीय सदस्यहरुले डा शेखर कोइराला पक्षका नेताहरुमाथि दवावपूर्ण व्यवहार गर्न थालेपछि उपसभापति गुरुङले मुख खोलेका हुन् । उनले बैठकमा स्पष्ट पार्दै भने, ‘सभापतिको हात बलियो बनाउने भनेको वैचारिक बहसले हो । तर बलियो बनाउने नाममा कचौरामा तेल बोकेर पाखुरामा लगाउन सकिँदैन ।’

उनले पार्टी महामन्त्री एवं सांसद गगनकुमार थापामाथि पटक पटक देउवा पक्षीय नेताहरुले आक्रमण गर्न थालेपछि उनी आक्रोशित भए । पार्टीलाई पटक पटक पार लगाएका गगन थापालाई देखाइदिन्छौं भन्नेलाई प्रश्न गर्दै उनले भने, ‘एमसीसीलाई गगनले जसरी ब्याख्यात्मक टिप्पणीसहित पास गराउन सफल भए के तपाईहरुले सक्नुहुन्थ्यो ? सभापतिको नाकको झिँगा भगाउन खोजिएको छ । झिँगा हटाउने नाममा खुकुरी तरबार लिएर आएका छन् त्यो चल्यो भने के हुन्छ ?’