काठमाडौं। इरानले रुसलाई सतहदेखि सतहमा मार हान्ने क्षेप्यास्त्र र थप ड्रोन उपलब्ध गराउने वाचा गरेको दुई वरिष्ठ इरानी अधिकारीहरू र दुई इरानी कूटनीतिज्ञहरूले रोयटर्सलाई बताएका छन् ।
अक्टोबर ६ मा इरानका प्रथम उपराष्ट्रपति मोहम्मद मोख्बर, इरानको शक्तिशाली रिभोलुसनरी गार्डका दुई वरिष्ठ अधिकारी र सर्वोच्च राष्ट्रिय सुरक्षा परिषद्का एक अधिकारीले रुससँग हतियारको डेलिभरीको बारेमा वार्ता गर्न मास्को भ्रमण गर्दा सम्झौता भएको बताइएको छ ।
'रुसीहरूले थप ड्रोन र सुदृढ सटीकता भएका विशेष गरी फतेह र जोल्फाघर मिसाइलको माग गरेका थिए,' एक इरानी कूटनीतिज्ञले भनेका थिए ।
यस विषयमा ब्रीफिङ गरेका एक पश्चिमी अधिकारीले इरान र रुसबीच जल्फाघर लगायतका छोटो दुरीका ब्यालेस्टिक मिसाइल उपलब्ध गराउने सम्झौता भएको बताएका छन् ।
इरानले आपूर्ति गर्न सहमत भएका ड्रोनहरू मध्ये एक शाहेद-१३६ हो । डेल्टा-पखेटा भएको हतियार 'कामिकाजे' एयर-टु-सर्फेस आक्रमण विमानको रूपमा प्रयोग गरिन्छ। यसले एउटा सानो वारहेड बोक्छ जुन प्रभावका साथ विस्फोट हुन्छ।
आफुले युक्रेनलाई अर्बाैंको हातहतियार पठाइरहेको भए पनि इरानको यो कदमले अमेरिकालगायतका पश्चिमा मुलुकहरुलाई टाउको दुखाई हुने ठानिएको छ ।
