जनकपुरधाम । जनकपुरधाममा जारी सप्ताहव्यापी विवाह पञ्चमी महामहोत्सव अन्तर्गत शनिबार तिलकोत्सव सम्पन्न भएको छ । शनिबार विवाह पञ्चमीको चौथो दिन राम मन्दिरको प्राङ्गणमा तिलकोत्सव विधि सम्पन्न भएको हो ।
त्रेता युगमा भगवान् राम र सीताको शुभ विवाह भएको सम्झनामा जनकपुरधाममा एक सातासम्म मनाइने श्रीसीताराम विवाह पञ्चमी महामहोत्सव अन्तर्गत तिलकोत्सव मनाइएको हो ।
विवाहपञ्चमी भन्दा दुई दिन पूर्व हुने तिलकोत्सव साताव्यापी विवाहपञ्चमीको मुख्य आकर्षण हुने गरेको छ । यस अवसरमा स्थानीय श्री राम युवा कमिटीले जन्तीको बन्दोवस्त गर्ने गरेको छ भने श्री महावीर युवा कमिटीले जानकी मन्दिरको तर्फबाट अर्थात् सराती बेहुलीको पक्षमा रहने गरी सम्धी मिलान कार्यक्रममा सहभागी हुने गरेका छन् ।
सो अवसरमा राम र राजदेवी मन्दिरको प्रांगणमा शनिबार बेलुका श्रद्धालु भक्तजनहरुको व्यापक भीड लागेको छ । भारतीय तथा नेपालका गरी हजारौँ भक्तजनहरुको अगाडि सम्धी मिलानमा जानकी मन्दिरका महन्थ जानकीको बुबा र राम मन्दिरका महन्थ भगवान रामको बुबाको रुपमा सहभागी रहनु भएको थियो ।
तिलकोत्सव हुनु भन्दा पूर्व जानकी मन्दिरवाट १ सय १ वटा पाहुर ९ भिष्ठार सहितको भार राम मन्दिरमा पठाइएको छ । पाहुरलाई लिएर जानकी मन्दिरका सहायक महन्थ रामरोशन दास वैष्णव स्वयं राम मन्दिर पुगेका थिए ।
जानकी मन्दिरबाट भगवान् रामको तिलकोत्सवका लागि कोसेली स्वरूप ‘भार’ बाजागाजासहित यस पटक जानकी मन्दिरका उत्तराधिकारी महन्थ रामरोशन दास वैष्णव साधु सन्त, महन्थ, योगी, सन्यासी, राजनीतिक दल तथा नागरिक समाजका प्रतिनिधि सहित राम मन्दिर पुगेका थिए ।
तिलकोत्सव कार्यक्रममा धनुषा निर्वाचन क्षेत्र नम्बर ३ बाट नवनिर्वाचित प्रतिनिधि सभा सदस्य जुलीकुमारी महतो, प्रदेश सभाका सदस्य दीपेन्द्र ठाकुर, जनकपुरधाम उपमहानगरपालिकाका मेयर मनोज साह र धनुषाका प्रमुख जिल्ला अधिकारी सुरेन्द्र पौडेललगायतको उपस्थित रहेको थियो ।
सप्ताहव्यापी विवाह पञ्चमी महामहोत्सव अन्तर्गत आइतबार मटकोर विधि तथा मंसिर १२ गते स्वयंम्बर तथा राति जानकी मन्दिरको प्राङ्गणमा आकर्षक मण्डपमा शुभ विवाह तथा मंसिर १३ गते राम कलेवासहित विवाह पञ्चमीको समापन गर्ने कार्यक्रम रहेका छन् ।
