उत्ताउलोपनले सम्बन्ध विच्छेदका घटना बढ्दै

प्रकाशित मिति : २०७२ मङ्सिर २१ सोमबार
धनगढी । कैलाली जिल्लामा श्रीमान–श्रीमतीबीच सम्बन्ध विच्छेदका घटना बढ्दै गएका छन् । अधिकारप्रति देखिएको सचेतना, सामाजिक परम्परागत संस्कारमा आउन थालेको आधुनिकतासँगै देखिन थालेको फेरबदल, विवाहपछि अर्कैसँग सम्बन्ध बढाउनेलगायतका कारणले सम्बन्ध विच्छेदका घटना बढ्दै जान थालेको बताइएको छ । 
 
सम्बन्ध विच्छेदका घटना बढ्दै जाँदा अदालतमा यससम्बन्धी मुद्दा दर्ता हुने क्रम पनि बढेको जिल्ला अदालतका स्रेस्तेदार जगदीश भट्टले बताउनुभयो । कैलाली जिल्ला अदालतमा यस वर्ष गएको साउनदेखि हालसम्म पाँच महिनाको अवधिमा मात्रै सम्बन्ध विच्छेदका ३९ वटा मुद्दा दर्ता भएका छन् । अघिल्लो वर्ष विसं २०७१ को साउनदेखि मङ्सिरसम्मको पाँच महिनामा योभन्दा कम मुद्दा दर्ता भएका थिए । 
 
चालु वर्षमा दर्ता भएका मुद्दामध्ये नौ मुद्दाको अदालतले फैसला गरिसकेको छ । बाँकी मुद्दाहरु कारबाहीको प्रक्रियामा रहेका छन् । अंश दिलाई सम्बन्ध विच्छेद गर्नुपर्ने कानुनी व्यवस्था रहेको भए पनि अंश नलिइकन सम्बन्ध विच्छेद गराउन चाहनेहरु बढी रहेको बताइएको छ । 
 
अंश नलिई सम्बन्ध विच्छेद गराउन चाहनेको मुद्दाको फैसला तुलनात्मक रुपमा छिटो हुने गरेको छ । तर अंशसहितको सम्बन्ध विच्छेद गर्न चाहनेहरुको फैसलामा केही ढिलाइ हुने गरेको छ । अंश लाग्ने सम्पत्तिको दुवै पक्षको फाँटवारी पेस गर्नुपर्नेलगायतका प्रक्रिया पूरा गर्नुपर्ने हुँदा यस्ता मुद्दाको फैसला केही ढिलो हुने गरेको छ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ