मुगु । मुगुको एक गाउँकी ८० वर्षीया जेष्ठ नागरिकले बल्ल नागरिकताको प्रमाण पत्र पाएकी छिन् । मुगु जिल्ला मुगुम कार्मारोङ्ग गाउँपालिका ५ सेरोग गाउँकी नोन्जोम कामीले ८० वर्षको उमेरमा नागरिकता पाएकी हुन् ।
२००० साल बैशाख १२ गते जन्मिएकी कामीलाई २०८१ साल बैशाख १२ गते नै प्रमुख जिल्ला अधिकारी टोपेन्द्र केसीले नागरिकत प्रमाण पत्र नम्बर ५८–०१(८१–०००४१ को प्रदान गरेका हुन् ।
३५ वर्षअघि कामीका श्रीमान् सोनाम तेन्जिन कामीको मृत्यु भएको थियो । विकट गाउँ जहाँबाट जिल्ला सदरमुकाम गमगढी पुग्न २–३ दिन हिँड्नु पर्ने भएपछि जान आउन समस्या र नागरिकताको आवश्यकताबारे जानकारी नहुँदा नागरिकता लिन ढिलाइ भएको थियो ।
जब श्रीमानको मृत्यु भयो घरमा कमाउने मान्छे भएन । २ छोरा पाल्न धौ धौ भयो । सरकारले भत्ता दिन्छ भनेर नागरिकता लिन खोज्दा श्रीमान् नहुँदा नागरिकता बनेन ।
२ छोरामध्ये एक छोराको सिलाजित निकाल्दा लडेर मृत्यु भयो । अर्को छोराको पनि उनको नागरिकता नहुँदा उनको पनि नागरिकता बनेन । छोराबाट २ नातिनी र १ नाति छन् ।
छोरा र आफ्नो नागरिकता नहुँदा उनीहरुको जन्मदर्ता नबन्दा सरकारले दिने भत्ता पाएका छैनन् । उनले नागरिकता पाएपछि छोराको पनि बन्ने भयो भन्दै नाति नातिनीहरुले पनि भत्ता पाउने भए भन्दै खुशी भइन् ।
श्रीमानको नागरिकता, माइती पक्षको सनाखत र नागरिकता पाउनका लागि आवश्यक पर्ने अनुसूचीसहित अन्य कागजातहरु पुगेपछि र ढिला नागरिकता लिनाको कारणबारे विश्वास लाग्दो प्रमाण जुटेपछि ८० वर्षीया आमालाई नागरिकता दिएको प्रजिअ केसीले बताए ।
८० वर्षमा पनि नागरिकता नबन्दा सिङ्गो परिवारै राज्यबाट पाउने सेवा सुविधाबाट बन्चित हुँदै आएको थियो ।
विभिन्न संचार माध्यममा यो परिवारकोबारे समाचार आएपछि स्थानिय समाजसेवी सोनाम लामा कार्मारोङ्ग र वडा अध्यक्ष दावा साङवा तामाङ्गले आमाको जिम्मा लिएर सदरमुकाम ल्याएका थिए ।
सदरमुकाम आएको १७ दिनसम्म सोनाम लामा कार्मारोङ्गले ८० वर्षीया आमाको नागरिकता सम्बन्धी कागजात जुटाएपछि बल्ल बुधबार आमाको नागरिकता बन्न सकेको थियो ।
आमाले नागरिकता पाएको र अब छोराको नागरिकता, नाती, नातिनीहरुको जन्मदर्ता र भत्ता उपलब्धताको प्रकृयामा आफू लाग्ने समाजसेवी लामाले बताए ।
