रुस–युक्रेन युद्ध अन्त्यका लागि 'बर्लिन मस्यौदा' तयार: ९० प्रतिशत मुद्दामा सहमति जुटेको दाबी
हाम्रा कुरा
प्रकाशित २०८२ पुष २ बुधबार
729
Shares
काठमाडौँ। रुस र युक्रेनबीच जारी लामो युद्ध अन्त्यका लागि तयार पारिएको २० बुँदे शान्ति योजनाको मस्यौदामा ९० प्रतिशत सहमति जुटेको अमेरिकी अधिकारीहरूले दाबी गरेका छन्।
जर्मनीको बर्लिनमा दुई दिनसम्म चलेको सघन कूटनीतिक वार्तापछि यो ऐतिहासिक प्रगति बाहिर आएको हो। अमेरिकी राष्ट्रपति डोनाल्ड ट्रम्पका विशेष दूत स्टिभ विटकफ र उनका ज्वाइँ जारेड कुशनरले आइतबार र सोमबार युक्रेनी राष्ट्रपति भोलोडिमिर जेलेन्स्की तथा अन्य युरोपेली नेताहरूसँग शान्ति सम्झौताबारे निर्णायक छलफल गरेका थिए।
यसै सन्दर्भमा युक्रेनी राष्ट्रपति जेलेन्स्कीले सामाजिक सञ्जाल 'एक्स' मार्फत बर्लिन वार्तालाई शान्ति सम्झौताको 'पहिलो मस्यौदा' का रूपमा टिप्पणी गर्दै यसलाई सकारात्मक सुरुवात मान्नुभएको छ।
प्रस्तावित मस्यौदामा युक्रेनका लागि सुरक्षा ग्यारेन्टीको विषयलाई प्रमुखताका साथ उठाइएको छ, जुन नेटोको धारा ५ जस्तै बलियो हुने बताइएको छ। तर, यस योजनामा अमेरिकी सेनालाई प्रत्यक्ष रूपमा युक्रेनमा नखटाइने स्पष्ट पारिएको छ। युरोपेली नेताहरूले पनि युक्रेनको भविष्यको सुरक्षाका लागि बलियो र भरपर्दो ग्यारेन्टी दिन आफ्नो प्रतिबद्धता दोहोर्याएका छन्।
यद्यपि, यो वार्तामा रुसको सहभागिता नरहेकाले मस्कोले यस प्रस्तावलाई सहजै स्वीकार गर्नेमा भने अझै निश्चित छैन। रुसको संलग्नता बिनाको यो सहमतिले युद्धलाई पूर्ण रूपमा विश्राम दिन कत्तिको मद्दत पुर्याउँछ भन्ने कुरालाई अहिले विश्वभर निकै चासोका साथ हेरिएको छ।
