काठमाडौँ । पोर्चुगल विश्वकप फुटबलको प्रिक्वार्टरफाइनलमा प्रवेश गरेको छ । आज भएको खेलमा क्रोएसियालाई २–१ ले पराजित गर्दै पोर्चुगल अन्तिम १६ मा पुगेको हो । 

क्यानाडाको बीएमओ फिल्डमा मध्यान्तरसम्म गोलरहित बराबरी भएको खेलमा मध्यान्तरपछि क्रोएसियाले गोलको खाता खोलेको थियो । 

५३ औँ मिनेटमा इभाँ पेरिसिकले गोल गर्दै क्रोएसियालाई अग्रता दिलाए । ६८ औँ मिनेटमा पोर्चुगलले बराबरी गर्यो । 

पेनाल्टीलाई सदुपयोग गर्दै क्रिष्टियानो रोनाल्डोले गोलमा परिणत गरे । रोनाल्डोको यो विश्वकपको ११औँ गोल हो ।

निर्धारित ९० मिनेटको खेल बराबरीतर्फ अगाडि बढिरहेका बेलामा इन्जुरी समयको चौथो मिनेटमा गोन्सालो रामोसले गोल गर्दै पोर्चुगललाई जिताए । 

इन्जुरी समयको १३ औँ मिनेटमा क्रोएसियाका यास्को जीभाडिओलले गोल गरेका भए पनि भीएआरले उक्त गोललाई मान्यता नदिएसँगै क्रोएसिया सनसनीपूर्ण बराबरी गर्ने अवसरबाट वञ्चित भएको थियो । 

यो खेलको अन्तिम इन्जुरी समय १९ मिनेटसम्म पुगेको थियो । 

पोर्चुगलले समूह चरणमा नवप्रवेशी टिम उज्बेकिस्तानलाई ५–० ले हराएको थियो भने कोलम्बियासँग गोलरहित तथा चेक गणतन्त्रसँग १–१ गोलको बराबरी खेलेको थियो । 

समूह चरणमा क्रोएसियाले घानालाई २–१ ले तथा पानामालाई १–० ले हराउँदा इङ्गल्याण्डसँग भने ४–२ ले पराजित भएको थियो ।

अहिलेसम्म को को पुगे प्रिक्वार्टरफाइनलमा ?
    
अमेरिका, क्यानाडा र मेक्सिकोमा भइरहेको विश्वकप फुटबलमा अहिलेसम्म १२ टिम प्रिक्वार्टरफाइनलमा प्रवेश गरेका छन् । 

पहिलो पटक ४८ टिमले सहभागिता जनाएको प्रतियोगितामा समूह चरणबाट १६ टिम बाहिरिएका थिए । समूहको पुछारमा रहने टिम र उत्कृष्ट आठभित्र पर्न नसक्ने तेस्रो स्थान ओगटेका चार टिम पहिलो चरणबाटै बाहिरिएका थिए । 

३२ टिम नकआउट चरणमा प्रवेश गरेकामा यो चरणबाट १६ टिम बाहिरिन्छन् । अहिलेसम्म भएका १२ खेलबाट १२ टिम बाहिरिएका छन् भने १२ टिम प्रिक्वार्टरफाइनलमा प्रवेश गरेका छन् । 

अहिलेसम्म सहआयोजक क्यानाडा, ब्रजिल, पाराग्वे, मोरक्को, नर्वे, फ्रान्स, मेक्सिको, इङ्गल्याण्ड, बेल्जियम, अमेरिका, स्पेन र पोर्चुगल प्रिक्वार्टरफाइनलमा प्रवेश गरेका छन् । 

अन्तिम ३२ को खेलमा क्यानाडाले दक्षिण अफ्रिकालाई १–० ले हरायो । ब्रजिलले जापानलाई २–१ ले हरायो । 

पाराग्वेले जर्मनीलाई पेनाल्टी सुटआउटमा ४–३ ले हरायो । मोरक्कोले नेदरल्याण्ड्सलाई पेनाल्टी सुटआउटमा ३–२ ले हरायो । 

त्यस्तै नर्वेले आइभरी कोष्टलाई २–१ ले पराजित गर्यो । 

फ्रान्सले केलियन एम्बाप्पेको दुई गोलको मद्धतले स्वीडेनलाई ३–० ले पराजित गर्यो । 

मेक्सिकोले इक्वेडरलाई २–० ले हरायो । इङ्गल्याण्डले डीआर कंगोलाई २–१ ले हरायो । 

त्यस्तै बेल्जियमले सेनेगललाई ३–२ ले हरायो । अमेरिकाले बोस्निया एन्ड हर्जगोविनालाई २–१ ले पराजित गर्यो । 

त्यस्तै स्पेनले अष्ट्रियालाई ३–० ले हरायो । पोर्चुगलले क्रोएसियालाई २–१ ले हरायो ।