संसद्मा भूमिका प्रभावकारी बनाउन एमालेको प्रशिक्षण
ओलीले एमाले सांसदलाई प्रशिक्षण दिँदै
हाम्रा कुरा
प्रकाशित २०८३ साउन ३ आइतबार
262
Shares
काठमाडौँ। नेकपा (एमाले) ले संसद्मा आफ्नो भूमिकालाई थप प्रभावकारी बनाउने उद्देश्यसहित आज संघीय संसद्का आफ्ना सांसदहरूसँग अन्तरक्रिया तथा प्रशिक्षण कार्यक्रम आयोजना गर्दैछ।
पार्टीको संसदीय विभागले बिहान ११ बजे पार्टी केन्द्रीय कार्यालयमा आयोजना गरेको कार्यक्रममा पार्टी अध्यक्ष केपी शर्मा ओलीले एमालेका सांसदहरूले संसद्मा निर्वाह गर्नुपर्ने भूमिकाका बारेमा प्रशिक्षण दिने विभागका प्रमुख एवं पार्टी सचिव पद्मा अर्यालले जानकारी दिइन्।
अर्यालका अनुसार संसद् सचिवालयका पूर्व सचिव हर्कराज राईले संसद् सचिवालयका काम, कर्तव्य र अधिकारका बारेमा सांसदहरूलाई जानकारी गराउने छन्। उनले संसदीय समितिहरूका अधिकार क्षेत्र र समितिमा उठाउनुपर्ने विषयका बारेमा समेत स्पष्ट पार्नेछन्।
यसैगरी पार्टी महासचिव शंकर पोखरेलले पार्टीको नीति र सांसदहरूको कर्तव्यका विषयमा प्रशिक्षण दिने अर्यालले बताइन्। उनका अनुसार हरेक सांसदले पार्टी नीति अनुरूप संसद्मा भूमिका निर्वाह गर्नुपर्ने भएकाले सम्बन्धित विषयमा पार्टीका विभागहरूसँग पनि समन्वय र परामर्श गर्नुपर्ने विषयमा महासचिव पोखरेलले स्पष्ट पार्नेछन्।
पार्टीका प्रचार तथा प्रकाशन विभागका प्रमुख नीरज आचार्यका अनुसार कार्यक्रममा सहभागी हुन सम्पूर्ण विभाग प्रमुख र विभागका पूर्व सदस्यहरूलाई पनि जानकारी गराइएको छ। सम्बन्धित विभागहरूले विषय विज्ञता भएका व्यक्तिहरूको नाम सिफारिस गरेर सांसदहरूलाई संसदीय विषयवस्तुहरूमा आवश्यक पर्दा परामर्श दिने रोस्टर बनाउने छन्। कार्यक्रममा प्रतिनिधि सभा र राष्ट्रिय सभा दुवै सदनका सांसदहरू सहभागी हुनेछन्।
