काठमाडौं । काठमाडौं क्षेत्र नम्बर ७ मा सचिवालय सदस्य वामदेव गौतमलाई प्रतिनिधिसभा उम्मेदवार बनाउन रामवीर मानन्धरले सांसद पदबाट राजीनामा दिएपछि नेपाल कम्युनिष्ष् पार्टी (नेकपा) भित्र एकाएक पहिरो गएको छ ।
डोल्पादेखि बर्दिया, दैलेख अनि नवलपरासीसम्मका नेकपाका सांसदले नपत्याएको अवस्थामा रामवीरले निकै कष्टपूर्वक वामदेवका लागि राजीनामा दिएपछि तरंग फैलिएको छ ।
यही कारणले बुधबारका लागि डाकिएको नेकपाको सचिवालयको बैठकसमेत स्थगित भएको छ । गत सोमबार बसेको सचिवालय बैठकले थप छलफल गर्नका लागि बुधबार बैठक बस्ने निर्णय गरेको थियो ।
तर शीर्ष नेता व्यस्त भएको भन्दै बैठक आउँदो शनिबारसम्मका लागि स्थगित गरिएको नेकपाले जनाएको छ । बुधबारको बैठकले स्थायी समिति बैठकको मिति र कार्यसूचि तय गर्ने भनिएको थियो ।
वरिष्ठ नेता माधवकुमार नेपालले प्रदेश कमिटीको पदाधिकारी चयन गर्ने सचिवालय बैठकको निर्णयप्रति असन्तुष्टि जनाएपछि त्यसलाई सम्बोधन गर्न स्थायी समिति बैठक बोलाउन माग गर्दै आएका छन् ।
वामदेवलाई उम्मेदवार बनाउने विषयले चर्चा पाएपछि नेपालको मुद्दा छायाँमा परेको छ । नेपालले केपी शर्मा ओली नेतृत्वको सरकारले भ्रष्टाचार बढाएकोदेखि आफूलाई पार्टीमा टाढा पार्न खोजिएको आरोपसहित असन्तुष्टि पत्र पार्टी कार्यालयमा दर्ता गराएका थिए ।
