काठमाडौं । भारतमा कोरोना भाइरसका संक्रमित एकैदिन दुई लाख १७ हजार थपिएका छन् । यो एकै दिन थपिएको कुनै पनि राष्ट्रको सबैभन्दा बढी हो । कोरोनाको संक्रमण भारतमा कहाली लाग्दो स्थितिमा पुग्ने क्रममा बिहीबार ९अप्रिल १५, बैशाख २ गते० २ लाख १६ हजार ६४२ जना थपिएका हुन् । 

यसअघि बुधबार १ लाख ९९ हजार ३७६ थपिएका थिए । संक्रमण उच्च बिन्दूमा पुगिरहँदा १४ दिनदेखि विश्वकै सबैभन्दा धेरै संक्रमित भारतमा थपिएका छन् । मंगलबार १ लाख ८५ हजार १०४ संक्रमित थपिएका थिए । 

सोमबार १ लाख ६० हजार ६९४ जना संक्रमित थपिएका थिए । आइतबारको तुलनामा सोमबार करिब १० हजार संक्रमित कम पाइए पनि मंगलबार भने ह्वात्तै बढेका थिए । आइतबार एक लाख ६९ हजार ९१४ जना संक्रमित थपिएका थिए ।  

हरेक दिन संक्रमित बढेको रेकर्ड बनिरहेको छ । निरन्तर बढिरहेको आँकडाले भारतसँगै छिमेकी देशहरुमा पनि कोरोनाको स्थिति भयावह बन्ने अवस्था देखिन्छ । गत सन् २०१९ को डिसेम्बरको अन्त्यदेखि चीनबाट देखिएको कोरोनाको संक्रमण भारतसम्म आइपुग्दा गत वर्षको सेप्टेम्बर १६ मा ९७ हजार ८५९ संक्रमित थपिएका थिए । 

गत वर्षको सेप्टेम्बरको अवस्थालाई पनि नाघेपछि भारतका विभिन्न राज्यमा लकडाउनदेखि कर्फयू लगाउनेसम्मका कामहरु भएका छन् । विद्यालयहरु ठप्प पारिएका छन् । कक्षा १० को परीक्षा रद्द गरिएको छ भने १२ को परीक्षा स्थगित गरिएको छ । दोस्रो लहरको नयाँ भेरियन्टले युवा र बालबालिकालाई बढी आक्रमण गरेको छ । 

कोरोनाको विभिन्न नयाँ भेरिएन्टका कारणले नियन्त्रणमा मुस्किल भएको छ । त्यसैगरी आम नागरिकको लापरबाही कडा चुनौती बनेको छ । 

कति छ भारतको ताजा तथ्याङ्क
योसँगै कुल संक्रमितको संख्या भारतमा १ करोड ४२ लाख ८७ हजार ७४० पुगेको छ ।  भारतमा सक्रिय संक्रमित बढेर १५ लाख ६३ हजार ५८८ पुगेका छन् । यसअघि गत सेप्टेम्बरमा पहिलो लहरको उच्च बिन्दूको समयमा सबैभन्दा बढी सक्रिय संक्रमित १० लाख २० हजार पुगेका थिए । 

मृतकको स्थिति पनि भयावह बन्दै गएको छ । पुरानै स्थितिमा पुग्ने क्रममा बिहीबार १ हजार १८२ जनाको ज्यान गएको छ ।  यो दोस्रो लहरपछिको सबैभन्दा धेरै हो । बुधबार १ हजार ३७ जनाको ज्यान गएको थियो । 

मंगलबार १ हजार २६ जनाको ज्यान गएको थियो । सोमबार ८८० जनाको ज्यान गएको थियो । आइतबार ९०४ जनाको ज्यान गएको थियो । शनिबार ८३८ जनाको ज्यान गएको थियो । शुक्रबार ७७३, बिहीबार ८०२, बुधबार ६८४ र मंगलबार ६३० जनाको ज्यान गएको थियो । 

अहिलेसम्म १ लाख ७४ हजार ३३५ जनाको ज्यान गइसकेको छ । बिहीबार १ लाख १७ हजार ८२५ जना संक्रमणमुक्त भएका छन् । अहिलेसम्म १ करोड २५ लाख ५३ हजार ९७८ जना संक्रमणमुक्त भएका छन् । 

राज्यहरुको अवस्था
सबैभन्दा बढी प्रभावित महाराष्ट्र भएको छ । बिहीबार ६१ हजार ६९५ जना संक्रमित थपिएका छन् । बुधबार ५८ हजार ९५२ जना संक्रमित थपिएका थिए । मंगलबार ६० हजार २१२ संक्रमित थपिएका थिए । सोमबार ५१ हजार ७५१ जना संक्रमित थपिएका थिए । आइतबार अहिलेसम्मकै सबैभन्दा बढी ६३ हजार २९४ जना संक्रमित थपिएका थिए । शनिबार ५५ हजार ४११ जना, शुक्रबार एकैदिन ५८ हजार ९९३ जना, बिहीबार एकैदिन ५६ हजार २८६ जना संक्रमित थपिएका थिए । 

हाल महाराष्ट्रमा मात्रै ६ लाख २० हजार ६० जना सक्रिय संक्रमित रहेका छन् । बिहीबार ३४९ जनाको ज्यान गएको छ । बुधबार २७८ जनाको ज्यान गएको थियो । मंगलबार २८१ जनाको ज्यान गएको थियो । सोमबार २५८ जनाको ज्यान गएको थियो । आइतबार एकैदिन ३४९ जनाको ज्यान गएको थियो । शनिबार ३०९, शुक्रबार ३०१, बिहीबार ३७६, बुधबार ३२२ र मंगलबार २९७ जनाको ज्यान गएको थियो । 

राजधानी दिल्लीमा समेत सक्रिय संक्रमित ५४ हजार ३०९ पुगेका छन् । 

उत्तर प्रदेशमा १ लाख २९ हजार ८४८ जना सक्रिय संक्रमित छन् । 

नियन्त्रणको नजिक पुगेको नेपालसँग सीमा जोडिएको राज्य बिहारमा अहिले फेरि सक्रिय संक्रमित बढेर ३० हजार ३३ जना पुगेका छन् । बिहीबार अहिलेसम्मकै सबैभन्दा बढी ६ हजार १३३ जना संक्रमित भएका छन् । बुधबार अहिलेसम्मकै बढी ४ हजार ७८६ जना संक्रमित थपिएका थिए ।

मंगलबार बढी ४ हजार १५७ जना संक्रमित थपिए । सोमबार २ हजार ९९९ जना संक्रमित थपिएका थिए । आइतबार सबैभन्दा बढी ३ हजार ७५६ जना संक्रमित थपिए । शनिबार ३ हजार ४६९, शुक्रबार २ हजार १७४ जना संक्रमित थपिएका थिए । 

संक्रमित बढेसँगै अस्पतालहरु भरिभराउ भएका छन् । खुला आकाशमा बिरामीको उपचार हुन थालेका खवरसमेत आएका छन् । औषधिको समेत अभाव भएको छ । बिरामीका लागि रेमडेसिभिर इन्जेक्सन समेत नपाइएको दुखेसो पीडितले गरेका छन् । 

भारतमा अहिलेसम्म ११ करोड ४४ लाख ९३ हजार २३८ जनालाई कोरोनाको खोप समेत लगाइसकिएको छ ।

तस्वीर–भारतको छत्तीसगढस्थित राइपुरको मेडिकल स्टोर बाहिर रेमडेसिभिर इन्जेक्सन लिनका लागि लाइनमा बसेका बिरामीका परिवार । एक पीडितले भने, ‘बुधबार बिहानदेखि ६ वटा इन्जेक्सनका लागि लाइनमा छु अहिलेसम्म पाएको छैन । मलाई एउटा भन्दा बढी दिइएको छैन ।’