कोलम्बिया । कोलम्बियामा मंगलवार भएको विमान दुर्घटना विमानको इन्धन सकिएका कारण भएको एक अडियो रेकर्डिङमा खुलेको छ । लिक भएको उक्त अडियो रेकर्डिङमा एक विमानचालकले विमानमा विद्युतीय गडबडी भएको अनि इन्धन सकिएको भनी लगातार अवतरण अनुमति मागेको बीबीसीले जनाएको छ । विमान दुर्घटनामा परेका ८१ मध्ये ६ जना मात्र बाँच्न सफल भएका थिए ।
एयर ट्राफिक टावरबाट प्राप्त टेपमा पाइलटले विमान दुर्घटना हुनु अघिसम्म पनि इन्धन सकिएको भन्दै अवतरणका लागि अनुमति मागेको सुनिएको छ । दुर्घटना हुनु पूर्व विमान ९ हजार फिटको उचाइमा रहेको पनि सोही टेपबाट खुलेको छ । पाइलटले कोलम्बियाको एयर ट्राफिकसँग गरेको कुराकानीको टेप लिक भएको हो ।
विमानमा ब्राजिलको फुटबल क्लब चापेकोएन्सेका खेलाडी, २१ जना पत्रकारसहितका यात्रु रहेका थिए । दुर्घटनामा ६ जना भने बाँच्न सफल भएका छन् । ज्यान गुमाउनेमा १९ खेलाडी र २० जना पत्रकार पनि परेका छन् ।
