सिलिगुडी । चौथो महिला साफ च्याम्पियनसिप फुटबल भारतको सिलिगुडीमा सोमबारदेखि सुरु हुँदैछ । प्रतियोगिताको उद्घाटन खेलमा नेपालले दिउँसो २ः१५ बजे भुटानसंग खेल्दैछ ।
नेपाल यसपटक उपाधि जित्ने लक्ष्यका साथ भारत गएको हो । मुख्य प्रशिक्षक कुमार थापाले उपाधि जित्नेमा आशावादी रहेको बताएका छन् ।
उनले नेपाल तीन पटकको उपविजेता भएकाले पनि उपाधिका लागि दबाब रहेको बताएका छन् ।
नेपालले मलेसियालाई मैत्रिपूर्ण अन्तर्राष्ट्रिय फुुटबलमा १–० ले पराजित गरेसंगै मनोवलसमेत उच्च पारेको छ ।
प्रशिक्षक थापाले यसपटक आफूहरुको तयारी लामो समयदेखि भइरहेकाले पनि उपाधि लिएरै फर्कनेमा विश्वास बढेको बताएका छन् ।
रेनुका नगरकोटीको नेतृत्वमा रहेको नेपाली टिममा युवा जोश बढी छ । उनले टिम पछिल्लो गल्ती हटाएर उपाधि जित्न आतुर रहेको बताएकी छिन् ।
नेपाल पछिल्ला तीन संस्करणको फाइनलमा भारतसंग पराजित भएको थियो । अन्य राष्ट्रहरुमाथि भने नेपाल फराकिलो जितका साथ अगाडि बढिरहेको छ ।
समूह ए मा रहेको नेपालले पहिलो खेलमा भुटानसंग खेल्न लागेको हो । खेल सिलिगुडीको कञ्चनगंगा मैदानमा हुँदैछ ।
