ह्वाइट हार्ट लेन । इङलिश प्रिमियर लिग फुटबलमा चेल्सीको कीर्तिमानी विजयी यात्रामा पूर्णविराम लागेको छ । लगातार १३ खेल जितेर कीर्तिमान रचेको चेल्सी बिहीबार बिहान भएको खेलमा टोटनह्याम हट्सपरसंग २–० ले पराजित भएको हो । टोटनह्यामकै मैदानमा भएको खेलमा घरेलु टोलीलाई जिताउन डेले अलीले दुवै गोल गरे ।
४५ औं मिनेटमा पहिलो गोल गरेका अलीले ५४ औं मिनेटमा अर्को गोल थपेका थिए । क्रिष्टियन इरिक्सेनको क्रसमा अलीले हेडर गोल गर्दै गोलमा खाता खोलेका थिए । यो सिजनमै २० वर्षे अलीले १० गोल गरिसकेका छन् ।
यो खेलसंगै टोटनह्यामले पनि आफ्नो उपाधि दावेदारीलाई कामयै राखेको छ । २० औं चरणको समाप्तिसम्म ४९ अंकसहित चेल्सी शीर्ष स्थानमा कायमै छ ।
४४ अंकको लिभरपुल दोस्रो स्थानमा छ भने ४२ अंकबाट टोटनह्याम तेस्रो स्थानमा चढेको छ ।
४२ अंकबाटै म्यानचेष्टर सिटी चौथो तथा ४१ अंकबाट आर्सनल पाँचौं स्थानमा धकेलिएको छ ।
