लण्डन । इङलिश क्लव आर्सनलका म्यानेजर आर्सेन विंगरमाथि चार खेलको प्रतिवन्ध लागेको छ । इङलिश फुटबल एफएले गत आइतबार भएको खेलमा बर्नलेमाथि २–१ को जित हासिल गर्ने क्रममा रेफ्री जोन मोस र फोर्थ अफिसियल एन्टोनी टेलरमाथि अभद्र व्यवहार गरेपछि उनलाई चार खेलमा मैदान प्रवेशमा प्रतिवन्ध लगाइएको हो ।
विंगरले खेल सकिए लगत्तै गल्ती स्वीकारे पनि उनलाई चार खेलको प्रतिवन्धका साथै २५ हजार पाउण्ड जरिवाना गरिएको हो । आर्सनलले यसबारे कुनै अपील नगर्नेसमेत जनाएको छ ।
यो कार्वाहीसंगै फ्रेन्च प्रशिक्षक विंगरले शनिबार एफए कप फुटबलको खेलमा साउथह्याम्पटनविरुद्ध देखिने छैनन् ।
त्यसैगरी बाँकी तीन खेल प्रिमियर लिगका हुनेछन् । उनी वाटफोर्ड, चेल्सी र हलसिटी विरुद्धको खेलमा देखिने छैनन् ।
