क्याम्प नोउ । स्पेनिश फुटबल लिग ला लिगामा बार्सिलोनाको विजयी यात्राले सुधार गरेको छ । बार्सिलोना घरेलु मैदान क्याम्प नोउमा शनिबार राति एथलेटिक बिलबाओलाई पराजित गर्न सफल भयो ।
बार्सिलोना ३–० ले विजयी भएको हो । बार्सिलोनालाई जिताउन फ्रान्सिस्को एल्कासर, लिओनल मेसी र एलेक्सिस भिदालले एक एक गोल गरे ।
अन्य खेलमा एथलेटिको मड्रिडले लेगानेसलाई २–० ले, आइबरले भ्यालेन्सियालाई ४–० ले, स्पानियोलले मालागालाई १–० ले हरायो ।
लिगमा आइतबार सेभिया र भिल्लारियल, स्पोर्टिङ गियोन र एलाभेस, रियाल सोसिडाड र ओसासुना तथा रियाल मड्रिड र सेल्टाभिगो भिड्दै छन् ।
रियालले सेल्टाको मैदानमा राति १ः३० बजे खेल्न लागेको हो ।
लिगमा १९ खेलबाट ४६ अंकको रियाल मड्रिड शीर्ष स्थानमा कायमै छ ।
दुई खेल बढी खेलेको बार्सिलोनाको ४५ अंक भएको छ ।
बार्सिलोनाभन्दा एक खेल कम खेलेको सेभियाको ४२ अंक छ ।
