इमाइरेट्स स्टेडियम । इङलिश प्रिमियर लिग फुटबलमा आर्सलले दोस्रो स्थानलाई मजबुद बनाएको छ । शनिबार राति भएको खेलमा घरेलु मैदानमा हलसिटीमाथि २–० को जित निकाल्दै आर्सलले ५० अंकका साथ दोस्रो स्थानमा रहेको टोटनह्याम हट्सपरलाई भेट्टाएको हो ।
आर्सनललाई जिताउन दुवै गोल एलेक्सिस सान्चिजले गरे । ३४ औं मिनेटमा पहिलो गोल गरेका सान्चिजले अन्तिम समयमा पेनाल्टीमार्फत दोस्रो गोल गरेका हुन् । फल खेलेपछि अन्तिम समयमा हल सिटीका साम क्लुकासले रातो कार्ड खाएका थिए ।
यता, टोटनह्यामले भने आफ्नो खेलमा लिभरपुलसंग २–० कै हार बेहोरेको छ । घरेलु मैदानमा खेलेको लिभरपुललाई महत्वपूर्ण जित दिलाउने क्रममा १६ औं र १८ औं मिनेटमा सादिओ मानेले गोल गरेका हुन् । यो जितले लिभरपुल पनि दोस्रो स्थानका लागि दावेदार बनेको छ ।
यता वाट्फोर्टलाई घरेलु मैदानमा २–० ले हराएको म्यानचेष्टर युनाइटेड पनि शीर्ष चारका लागि संघर्षरत छ । म्यानयुलाई जिताउन हुँवा माटा र एन्थोनी मार्सियलले एक एक गोल गरे ।
शनिबार रातिका अन्य खेलमा स्टोक सिटीले क्रिष्टल प्यालेसलाई १–० ले तथा साउथह्याम्पटनलले सन्डरल्याण्डलाई ४–० ले हरायो ।
मिडिल्सब्रो र एभर्टनले गोलरहित तथा वेष्टह्याम र वेष्टब्रोमले २–२ को बराबरी खेलेका छन् ।
लिगमा २४ खेलबाट ५९ अंकसहित चेल्सी शीर्ष स्थानमा कायमै छ । एक खेल बढी खेलेको टोटनह्याम ५० अंकसहित दोस्रो, समान अंकबाटै आर्सनल तेस्रो स्थानमा छ ।
लिभरपुल ४९ अंकसहित चौथो, एक खेल कम खेलेको म्यानचेष्टर सिटी पाँचौं तथा ४८ अंकको म्यानचेष्टर युनाइटेड छैटौं स्थानमा छ ।
