किंग पावर स्टेडियम । टिमलाई सर्वाधिक सफलता दिलाएका प्रशिक्षक हटाएको चार दिनपछि नै डिफेन्डिङ च्याम्पियन लेस्टर सिटीले इङलिश प्रिमियर लिग फुटबलमा चामत्कारिक प्रदर्शन गरेको छ ।
खराव लयबाट गुज्रिएको लेस्टरले क्लाउडियो रानिएरीलाई हटाएपछिको पहिलो खेलमा लिगको उपाधि दावेदार लिभरपुलमाथि ३–० को शानदार जित दर्ता गराएको हो ।
घरेलु मैदान किंग पावर स्टेडियममा खेलेको लेस्टरलाई जिताउन जमाइ भार्डीले दुई तथा ड्यानी ड्रिंकवाटरले एक गोल गरे ।
३–० ले पछि परेको लिभरपुललाई ६८ औं मिनेटमा फिलिप्पे कौटिन्होले सान्त्वना गोल दिलाएका थिए ।
यो जितले भने एउटा प्रशिक्षकले कति ठूलो भूमिका खेल्न सक्दो रहेछ भन्ने प्रमाणित भएको छ । योसंगै प्रशिक्षक मार्क अल्ब्राइटनले लेस्टरबाट राम्रो डेब्यु गरेका छन् ।
जितपछि रेलिगेशनबाट बच्न संघर्षरत लेस्टर २६ खेलबाट २४ अंकसहित लिग तालिकाको १५ औं स्थानमा पुग्न सफल भएको छ । हारपछि भने लिभरपुलको तेस्रो स्थानमा पुग्ने सपना चकनाचुर भएको छ ।
लिभरपुल २६ खेलबाट ४९ अंकसहित पाँचौं स्थानमा छ । २६ खेलबाट ६३ अंकको चेल्सी शीर्ष स्थानमा विराजमान हुँदा ५३ अंकको टोटनह्याम दोस्रो तथा एक खेल कम खेलेर ५२ अंकमा रहेको म्यानचेष्टर सिटी तेस्रो स्थानमा छ ।
त्यस्तै ५० अंकको आर्सनल चौथो तथा ४८ अंकको म्यानचेष्टर युनाइटेड छैटौं स्थानमा छ ।
