सान्टियोगो बर्नाबाउ । स्पेनिश लिग ला लिगामा बार्सिलोनाले आकर्षक प्रदर्शन गर्दै उपाधि भिडन्तलाई रोचक बनाएको छ ।
आइतबार राति एल क्लासिको अन्तर्गत रियाल मड्रिडसंगको भिडन्त जित्दै डिफेन्डिङ च्याम्पियन बार्सिलोना अंक तालिकाको शीर्ष स्थानमा पुगेको छ ।
रियालकै मैदानमा भएको खेल ३–२ ले जितेर बार्सिलोना शीर्ष स्थानमा पुगेको हो ।
खेलमा बार्सिलोनालाई विजयी गराउन लियोनल मेसीले वास्तविक नायकको भूमिका खेले ।
२८ औं मिनेटमा क्यासेमिरोले गोल गर्दै रियाललाई अग्रता दिलाए । त्यसको ५ मिनेटमै मेसीले गोल गर्दै बार्सिलोनालाई बराबरीमा ल्याए ।
७३ औं मिनेटमा इभाँ राकिटिकले गोल गर्दै बार्सिलोनालाई २–१ को स्थितिमा ल्याए । ७७ औं मिनेटमा सर्जिओ रामोसले रातो कार्ड खाए ।
उनले मेसीमाथि फाउल खेलेका थिए । रामोसको यो करियरको २२ औं रातो कार्ड थियो । १० जनामा समेटिएको रियालले ८५ औं मिनेटमा जेम्स रोड्रिग्वेजको गोलबाट बराबरी गर्न सफल भयो ।
तर इन्जुरी समयमा मेसीले दोस्रो गोल थप्दै बार्सिलोनालाई जिताएनन्मात्र उपाधिका लागि गतिलो दावेदारी दिए ।
यो खेलमा पराजित भएको भए बार्सिलोना उपाधिबाट टाढिने पक्का थियो । रियालका लागि क्रिष्टियानो चल्न सकेनन् भने बार्सिलोना नेइमार नभएसंगै दबाबमा थियो ।
यो जितले बार्सिलोना ३३ खेलबाट ७५ अंकसहित गोल अन्तरमा रियाललाई पछाडि पार्दै शीर्ष स्थानमा रहेको हो ।
गोल अन्तरमा बार्सिलोनाको ६२ गोल छ भने रियालको ४८ मात्र छ ।
रियालले भने एक खेल कम खेलेर सो सफलता हासिल गरेको हो ।
