युरोपा लिग फुटबलः म्यानचेस्टर युनाइटेड र आयाक्सबीच उपाधि भिडन्त
प्रकाशित २०७४ वैशाख २९ शुक्रबार
180
Shares
ओल्ड ट्राफोर्ड । इङलिश प्रिमियर क्लव म्यान्चेस्टर युनाइटेड र डच क्लव आयाक्सबीच युरोपा लिग फुटबल प्रतियोगिताको उपाधि भिडन्त हुने भएको छ ।
बिहीबार राति भएका सेमिफाइनलमा सफलता हासिल गर्दै म्यानचेस्टर र आयाक्स फाइनलमा पुगेका हुन् ।
आफ्नै मैदानमा भएको सेमीफाइनल दोस्रो लेगको खेलमा स्पेनिश क्लव सेल्टाभिगोसँग १–१ गोलको बराबरीमा रोकिएको म्यान्चेस्टर एग्रिगेटमा २–१ को जितसहित फाइनलमा पुगेको हो । पहिलो लेगको खेलमा म्यानचेस्टर युनाइटेड १–० ले विजयी भएको थियो ।
तनावपूर्ण दोस्रो लेगको खेलमा फेलाइनीले १७ मिनेटमै गोल गर्दै घरेलु टिम म्यानचेस्टरलाई अग्रता दिलाए ।
८५ औं मिनेटमा सेबास्तियन रोन्काले गोल गर्दै सेल्टाभिगोलाई बराबरीमा ल्याए । तर त्यसपछिको अन्तिम क्षण तनावग्रस्त बन्न पुग्यो ।
दुवै टिमका एक एक खेलाडीले रातो कार्ड पाए । दुवै टिमका खेलाडी आपसमा झगडा गर्न उत्रिएपछि म्यानचेस्टरका खेलाडी इरिक बेली र सेल्टाभिगोका खेलाडी रोन्कालाई रोमानियाका रेफ्री हातेगानले सीधै रातो कार्ड देखाएका हुन् ।
७५,१३८ दर्शकबीच भएको यो खेलपछि म्यानचेस्टर फाइनलमा पुगेको हो ।
यता, अर्को सेमिफाइनलमा फ्रेन्च क्लव लियोंसंग ३–१ ले पराजित भएपनि एग्रिगेटमा ५–४ ले विजयी हुँदै आयाक्स फाइनलमा पुगेको हो ।
