- सुन चाँदी दर
- विनिमय दर
- नेपाली पात्रो
- राशिफल
काठमाडौं । काठमाडौं महानगरपालिकामा सत्तारूढ दल माओवादी केन्द्रको मेयर र उपमेयर उम्मेद्वारको जमानत जफत भएको छ ।
मेयरका उम्मेद्वार सर्वोत्तमदास डंगोल र उपमेयरकी उम्मेद्वार सुशीला पौडेल दुबैको जमानत जफत भएको हो ।
डंगोलले ७ हजार ९ सय ६ मत ल्याएका थिए भने पौडेलले १० हजार ४ सय ४८ मत ल्याएकी थिइन् ।
खसेको कुल मत मध्ये डंगोलले ४।१३ प्रतिशत मत ल्याए भने पौडेलले ५।४६ मत ल्याइन् ।
माओवादी केन्द्रका काठमाडौं इन्चार्ज लेखनाथ न्यौपानेले काठमाडौं महानगरमा संगठन कमजोर भएका कारण हार्नु परेको बताएका छन् ।
स्थानीय तह निर्वाचनको नियमावली अनुसार निर्वाचनमा मतदान गरिएको जम्मा सदर मतको १० प्रतिशत मत नल्याउने उम्मेद्वारको जमानत जफत हुने प्रावधान छ ।
उक्त प्रावधान अनुसार काठमाडौंमा माओवादी केन्द्रका मेयरसहित २५ जनाको नजमानत जफत भएको छ ।
छोटो समयमा चर्चा कमाएका साझा पार्टीका उम्मेद्वार किशोर थापाले पनि जमानत जोगाउन सकेनन् ।
थापाले १८ हजार ४ सय ९६ अर्थात ९.६८ प्रतिशत मत ल्याएका थिए ।
काठमाडौं महानगरपालिकामा एक लाख ९७ हजार २ सय २७ मत खसेको थियो । जसमध्ये १ लाख ९१ हजार ४१ मत सदर भएको थियो ।
यसरी धरौटी जोगाउन कम्तिमा १९ हजार मत ल्याउनुपर्ने थियो ।
काठमाडौंबाट एमाले, कांग्रेस र विवेकशील नेपाली दलले मात्र जमानत जोगाएको थियो । (नागरिक दैनिक)