जलमग्न सिराहामा पानीको निकाश खोज्न थालियो, खानेपानीको समस्या कायमै
प्रकाशित २०७४ साउन ३० सोमबार
310
Shares
काठमाडौं । चारदिन अघिदेखि निरन्तर परेको पानीका कारण जलमग्न बनेको २ नं प्रदेशको सिराहाका विभिन्न शहरहरुमा जमेको पानीको निकाश खोज्न थालिएको छ । निकाश नभएकोले हिजो रातीदेखि पानी नपरेको भएपनि सिराहाको सिराहा नगरपालिका, लहान नगरपालिका लगायतका शहरी भेगहरु अझैपनि डुवानमा परेका छन् ।
यसरी पानी रोकिएपछि पनि पानी निकाश नभएपछि स्थानीय नगरपालिकाको सहयोगमा अहिले निकाश खोल्ने काम भईरहेको छ । नगरपालिकाका सबै आवश्यक सामानहरु सहित सबै स्थानीयले आफ्नो घरमा रहेको सामान बोकेर निकाशको लागि नहर खन्न आएका छन् ।
अहिले सिराहाका नगरपालिकाहरुमा विद्युत सेवा सूचारु भईसकेको छ । केही केही ठाउँमा भने बाढीका कारण विजुलीको खम्बा ढलेकोले विद्युत सेवा उपलब्ध हुन सकेको छैन ।
उता, सिराहाको अधिकांश ठाउँहरुमा पानीको हाहाकार देखिएको छ । राजमार्गभन्दा उत्तर तर्फ सबै घरपरिवारहरु कलको पानीमा आश्रित रहने गरेकोमा कलको पानी खोज्न नसकेकोले पानी पनि सापटी लिएर चलाउनु परिररहेको स्थानीय बताउँछन् ।
कतैकाले अहिले पानी केही सुकेको ठाउँबाट पानी ल्याउने त कसैले अरुको घरबाट पानी मागेर खाने गरिरहेका छन् । अहिले आईतबार रातीदेखि पानी परिरहेको छैन । त्यसैले पनि जनजीवन पहिलेको भन्दा विग्रीएको नभएपनि अझै ५ फिट जति पानी जमिरहेकोले जनजीवन भने कष्टकर बनिरहेको छ ।
