काठमाडौं । बडादशैंमा ठूलाबडा तथा मान्यजनको आशिषले ठूलो अर्थ राख्छ । बिना आशिषको त बडादशैं नै हुन्न होला ।
तर यस्तो लाग्छ कि मादक पदार्थ सेवन (मापसे) गरेर सवारी चलाउनेलाई ठूलाबडाले आशिष नै दिएनन् कि ।
यो आशिष सम्भवतः ठूलाबडाले ‘मापसे गरेर सवारी नचलाउनु’ भनेका भए दुर्घटना त कम हुन्थ्यो होला ।
महानगरीय ट्राफिक प्रहरी महाशाखाले ट्राफिक नियम उल्लंघन गरी सवारी साधन चलाउने ३ सय ६० जना सवारी चालकहरुलाई सोमबार उपत्यकाका विभिन्न स्थानबाट पक्राउ गरेको जनाएको छ ।
तीमध्ये मापसे गरेर सवारी साधन चलाउने ८० जना चालकहरु रहेका छन् ।
ट्राफिक प्रहरीले पहिलेका तुलनामा मापसेलाई निरुत्साहित गर्न मेहनत गरेको छ ।
एक ट्राफिक प्रहरी भन्छन् – हामी मेहनत गर्छौं माथिबाट छुट दिइन्छ ।
जवानले ड्युटीमा मेहनत गर्ने तर हाकिमले सोर्सफोर्सको नाममा छाडिदिने हो भने त्योभन्दा ठूलो दुर्भाग्य के होला ?
विगतका तुलनामा मापसे गरेर सवारी चलाउँदा मृत्यु हुनेको संख्या पनि घटेको छ ।
तर शून्य किन हुन सक्दैन ?
तिनै ट्राफिकले भने शून्य गर्न त लाइसेन्स खारेज गर्नुपर्छ ।
हुनत काठमाडौं उपत्यकामा बिना लाइसेन्स गाडी चलाउनेहरु अझै पनि छन् ।
नक्कली लाइसेन्स बन्ने क्रम अझै रोकिएको छैन ।
मिडियामा यस्ता समाचार आए पनि भित्री सेटिङ्ग अझै सकिएको छैन ।
भ्रष्टाचारले गर्दा नै यो गति निम्तिएको बताइन्छ ।
अब यस्तोमा आशिष दिनेहरु नै मापसेका लतधारी परे वा भ्रष्टाचारको लेपनमा परे त्यसको पारो नाप्नु जरुरी भएको छ ।
