'विर्तामोडमा सेना परिचालन गर्न अनुमती मागेका छौं' : प्रजिअ

प्रकाशित २०७४ कार्तिक १० शुक्रबार

विर्तामोड । झापाको जिल्ला सुरक्षा समितिको बैठकले तनावग्रस्त बनेको झापाको विर्तामोड क्षेत्रमा सेना परिचालन गर्न रक्षा मन्त्रालयसँग अनुमती माग्ने निर्णय गरेको छ । शुक्रबार आन्दोलनकारीहरुले गरेको बन्द आह्वानका क्रममा तनाव बढ्दै गएपछि बसेको समितिको बैठकले सेना परिचालन गर्नको लागि रक्षा मन्त्रालयसँग अनुमती लिने निर्णय गरेको प्रमुख जिल्ला अधिकारी ऋषिराम तिवारीले जानकारी दिए ।

उनले कर्फ्यू आदेश जारी भएपछि स्वतः सेना सडकमा आउने भन्दै बैधानिक रुपमा सेना परिचालन गर्नको लागि रक्षा मन्त्रालयसँग अनुमती माग्ने निर्णय गरिएको बताए । दिउँसैदेखि स्थितीलाई साम्य पार्नको लागि प्रयास गरेपनि त्यो सम्भव नभएकोले सेना परिचालन गर्नु पर्ने स्थिती सिर्जना भएको उनले बताए ।

अर्जुनधारा नगरपालिका– ११ का ११ वर्षीय लक्ष्मण शिवाकोटीको हत्यारालाई कानूनी कारवाहीको माग गर्दै विर्तामोडमा स्थानीयवासीले शुक्रबार बिहानैदेखि प्रदर्शन गरेका गरेका प्रदर्शनकारी माथि प्रहरीले दर्जनौं राउण्ड अश्रुग्यास तथा रवरको गोली प्रहार गरेको थियो। विर्तामोडको अवस्था तनावपूर्ण बनेपछि स्थानीय प्रशासनले दिउँसो साढे १ बजेदेखि अनिश्चित कालको लागि कर्फ्यू आदेश जारी गरेको हो ।

आक्रोशित भीडले विशेषगरी प्रहरी कार्यालय र नगरपालिकाका मेयरलाई बढी तार्गेटमा पारेका छन् । उनीहरुले सरकारी कार्यालयमा पति प्रहरी कार्यालय पछि मेयरकै घरमा बढी तोडफोड गरेका छन् । लामो समयसम्म बालक हत्याराको दोषी पत्ता नलगाईनु र त्यसमा मेयरको पनि मौनताले उनको पनि यस घटनामा संलग्नता रहेको आशंका गर्दै आक्रोशित भीड मेयर माथि समेत जाईलागेको हो ।