ललितपुर । अर्ध भूमिगत रहेका नेकपा मसालका महामन्त्री मोहनविक्रम सिंह बाहिर निस्कने प्रयासमा रहेका छन् । उनले यसका लागि अभ्यास तीव्र पारेका छन् ।
यसकै लागि उनी नेकपा माओवादी केन्द्रका अध्यक्ष पुष्पकमल दाहाल प्रचण्डसंग गोप्य वार्तामा बसेका छन् ।
उनी बिहिबार बिहान ७ः३० बजे प्रचण्ड निवास खुमलटार पुगे ।
दुवैबीच बाम गठबन्धनलाई कायमै राखेर अगाडि बढ्नेबारे कुराकानी भएको जनाइएको छ ।
भेटमा नेता सिंहले बामपन्थीहरु मिलेर अघि बढ्दा मात्रै मुलुकमा राजनीतिक स्थिरता र विकास सुनिश्चित हुने कुरामा जोड दिएको समेत जनाइएको छ ।
प्रचण्डले प्रतिनिधि सभा र प्रदेश सभा निर्वाचनमा बामपन्थीहरु मिल्दा राम्रो नतिजा आएको र देशमा सकारात्मक सन्देश गएको बताउँदै राष्ट्रिय सभा निर्वाचनमा पनि एमाले, माओवादी केन्द्र र मसाल बीचको चुनावी तालमेललाई कायमै राखिने बताएका थिए ।
भेटमा दुवै नेताहरु राष्ट्रिय सभा निर्वाचनमा साझा उम्मेद्वार खडा गर्दै बामपन्थी एकता र तालमेललाई बलियो बनाएर अगाडि बढ्न सहमत भएको जनाइएको छ ।
बाहिर यो सूचना प्रवाह गरे पनि गोप्य वार्ताको गाँठी कुरो भने पछि आउने नै छ ।
तर एमाले अध्यक्ष केपी शर्मा ओली उपचारका लागि भन्दै बैंकक रहेका बेलामा प्रचण्ड र मोहनविक्रमबीचको भेटलाई भने अर्थपुर्ण रुपले हेरिएको छ ।
