चिनियाँ स्टकमा पछिल्लो दुई दिन सन् २००८ यताकै सबैभन्दा ठुलो गिरावट

एजेन्सी

प्रकाशित २०७८ साउन २२ शुक्रबार

बेइजिङ। चीनको आफ्नो टेक्नोलोजी र शिक्षा क्षेत्रको व्यापक क्र्याकडाउनले गर्दा विश्व बजारमा नै चीनलाई ठुलो झड्का लागेको छ। अमेरिकामा सूचीबद्ध चिनियाँ स्टक मात्र पछिल्लो पाँच महिनामा ७६९ बिलियन अमेरिकी डलरले गिरावट भएको छ।

अमेरिकामा सूचीबद्ध चीनका ९८ प्रतिशत ठुला फर्महरूको ट्र्याक गरेको नास्डैक गोल्डेन ड्र्यागन चाइना सूचकाङ्कमा ७ प्रतिशतले गिरावट आएको छ । चीनले शिक्षा क्षेत्रमा ल्याएको विवादास्पद कानुनपछि उक्त गिरावट आएको हो।

चीनले विद्यालयमा कुनै पनि नयाँ एपहरू प्रयोग गरेर पठनपाठन गर्न नपाइने कानुन बनाएको छ। चीन सरकारले यस्ता सबै क्रियाकलापहरूको निगरानी गर्नेसमेत जनाएको छ। जसले गर्दा शिक्षा र प्रविधि क्षेत्रमा ठुलो चोट परेको छ।

शुक्रवार ८.५ प्रतिशतले गिरावट आएको छ भने भने सोमबार र शुक्रवारको गरी १५ प्रतिशत गिरावट भएको छ। यसले चीनलाई सन् २००८ को आर्थिक सङ्कटपछिको सबैभन्दा ठुलो झड्का लागेको बताइएको छ।

"पछिल्ला घटनाहरूले तर्कसङ्गत रूपमा हाई लाइट गर्दछ कि अधिकारीहरू केही वर्ष पहिलेको तुलनामा अब आफ्नो फराकिलो राजनीतिक लक्ष्य हासिल गर्नको लागी लगानीकर्ताहरूलाई अप्ठ्यारोमा पार्न खोजी रहेका छन्," क्यापिटल इकोनोमिक्सका वरिष्ठ बजार अर्थशास्त्रीहरू ओलिभर जोन्सले भने, "यो मोर्चामा अब के हुन्छ भनेर ठ्याक्कै भन्न गाह्रो छ तर सन्तुलनमा भने इक्विटीमा हुने नकारात्मक जोखिम बढेको जस्तो देखिन्छ।"

केही ठुला लगानीकर्ताहरू पहिले नै आफ्नो शेयर अनलोड गर्न थालेका छन् । क्याथी वुडको प्रमुख आर्क इनोभेसन ईटीएफले फेब्रुअरीमा ८ प्रतिशतको उच्च बिन्दुबाट यस महिनाको चिनियाँ शेयरको होल्डिंग ०.५ प्रतिशत कम भएको बताएको ब्लूम्वर्गले लेखेको छ।