काठमाडौं । पाकिस्तानले तालिबानलाई साथ दिएको स्पष्ट भएको छ । पाकिस्तानी प्रधानमन्त्री इमरान खानले अफगानिस्तानमा तालिबानले गुलामी प्रथा तोडेको बताउँदै तालिबानी कदमप्रति खुशी व्यक्त गरेका हुन् ।
सोमबार इस्लामाबादमा भएको एक कार्यक्रममा उनले तालिबानले गुलामी चेन तोडेको बताएका हुन् । पाकिस्तानी सेना र सरकारमाथि तालिबानलाई समर्थन र मद्धत गरेको आरोप लाग्दै आएकामा खानले खुलेआम प्रशंसा गरेसँगै उनी साथमा रहेको स्पष्ट भएको हो ।
उनले तालिबानको खुलेर प्रशंसासमेत गरेका छन् । विश्वभर अफगानिस्तानमा आतंकवादी शासनलाई लिएर गम्भीर आशंका व्यक्त भइरहँदा इमरान खानको यो प्रशंसाले भने उनको भूमिकाप्रति थप आशंका निम्तिएको छ ।
तालिबानले आइतबार जब काबुलमा कब्जा गर्यो तब पाकिस्तानका कयौं क्षेत्रमा खुशी मनाइएको थियो ।
सोमबार नै अफगानिस्तानबाट केही प्रतिनिधिहरु इस्लामाबाद पुगेर पाकिस्तानी विदेशमन्त्री शाह महमूद कुरैशीसँग भेटघाट गरेका छन् । उक्त भेटमा तालिबानका नेताहरु थिए कि थिएनन् भन्ने स्पष्ट भएको छैन ।
त्यस्तै अफगानिस्तानमा तालिबानी विद्रोहीको काबुल कब्जालाई लिएर चीन, रुस र इरानले पनि समर्थन गरेको पाइएको छ । अफगानिस्तानबाट अमेरिका जानुलाई नै यी राष्ट्रहरुले खुशीका रुपमा लिएको समेत दाबी गरिएको छ ।
अफगानिस्तानबाट अमेरिकी सेना फिर्ता गएसँगै तालिबानले आफ्नो पकड जमाएको हो । तालिबानी कब्जासँगै अमेरिका, इङल्याण्ड, जर्मनी, फ्रान्स लगायतका देशहरुले अफगानिस्तानमा दूतावास बन्द गर्दै छन् ।
