अफगानिस्तान द्वन्द्वको दोष जो बाइडेनलाई, ट्रम्पले मागे बाइडेनको राजीनामा
हाम्राकुरा संवाददाता,
प्रकाशित २०७८ भदौ ८ मंगलबार
871
Shares
फाइल तस्बिर
वासिङ्टन। अमेरिकाका पूर्वराष्ट्रपति डोनाल्ड ट्रम्पले वर्तमान राष्ट्रपति जो बाइडेनको राजीनामा माग गरेका छन्। अफगानिस्तानबाट असरफ घानी नेतृत्वको सरकार परास्त हुनुमा बाइडेन प्रशासन जिम्मेवार रहेको भन्दै उनले बाइडेनको राजीनामा मागेका हुन्।
अफगानिस्तानमा शान्तिपूर्ण र सफलतापूर्वक घानी सरकारलाई टिकाइराख्न र तालिबान लडाकुहरूलाई पराजित गर्न बाइडेन प्रशासन असफल भएको ट्रम्पको भनाइ छ। आइतबार जारी गरेको वक्तव्यमा ट्रम्पले लेखेका छन्, अफगानिस्तानमा देखिएको असफलताका कारण अव बाइडेनले राजीनामा दिनुपर्ने बेला आएको छ।
अफगानिस्तानमा अहिले जे भइरहेको छ, त्यो सबैको दोषी बाइडेन प्रशासन नै भएको ट्रम्पको आरोप छ। आफू यो कार्यकालका लागि पनि राष्ट्रपतिमा निर्वाचित भएको भए अफगानिस्तानमा यस्तो अवस्था नआउने आशय पनि उनले व्यक्त गरेका छन्।
अफगानिस्तानका राष्ट्रपति घानीले देश छोडेको र तालिबान लडाकुहरूले सत्ता कब्जा गरेसँगै ट्रम्पले यस्तो वक्तव्य जारी गरेका थिए। तालिवान विद्रोहीहरू देशको केन्द्रीय राजधानी काबुल प्रवेश गरेपछि घानीले देश छाडेका हुन्। देश छाडेपछि उनले थप रक्तपात हुन नदिन र अरू लाखौँको मृत्यु हुने घटनाबाट जोगाउनका लागि आफूले शान्तिपूर्ण तरिकाले देश छोडेको स्पष्ट पारेका छन्।
स्रोतका अनुसार अब तालिबान लडाकुहरूको तर्फबाट अली अहमद जलाली देशको अन्तरिम राष्ट्रपति बन्नेछन। तालिवान लडाकुहरूले १० दिनको अवधिमा अफगानिस्तानका प्रमुख सहरहरू नियन्त्रणमा लिएका हुन्। उनीहरूले नयाँ सरकार गठनका लागि आन्तरिक गृहकार्य गरिरहेको जनाइएको छ।
