नतिजा पकडमा पार्न निर्वाचनको पूर्व सन्ध्यामा पुटिनद्वारा व्यापक बजेट बाँडफाँड

रासस–एएफपी

प्रकाशित २०७८ भदौ ८ मंगलबार

putin.jpg1.jpeg — रुसी राष्ट्रपति भ्लादिमिर पुटिन

मास्को। आगामी महिना हुने संसदीय निर्वाचनअगाडि समर्थन जुटाउन पेन्सन प्राप्त व्यक्तिले १ सय ३५ अमेरिकी डलर बराबर नगद पाउने गरी एउटा आदेशमा रुसी राष्ट्रपति भ्लादिमिर पुटिनले मङ्गलवार हस्ताक्षर गरेका छन् । यसले पछिल्लो समय रूसको सत्तारुढ यूनाइटेड रसिया पार्टीको राजनीतिक अवस्था निर्वाचनमा सङ्घर्षपूर्ण रहेको बुझ्न सकिने पुटिनका आलोचकहरूको भनाइ छ ।

यो नगद वितरण सामाजिक खर्चको एक भागको रूपमा आउने र यसको भर्ताल राज्यकोषबाट आफ्नो पक्षमा निर्वाचन परिणाम पार्न राष्ट्रपति पुटिनले ल्याएको योजनाका रूपमा अर्थ्याइएको छ ।

रुसी नेता पुटिनले सेप्टेम्बरमा तल्लो सदन ‘स्टेट डुमा’ को निर्वाचन अगाडि यो योजना प्रस्ताव गरेका हुन् । रुसमा सामानहरूमा बढ्दो मूल्य र घट्दो रोजगारीका कारण पुटिनको दल युनाइटेड रसियाको ख्यातिमा निकै कमी आएको छ ।

रुसी राष्ट्रपतिले सेप्टेम्बर महिनामा १० हजार रुबल (१३५ अमेरिकी डलर) भुक्तानी गर्ने आदेशमा हस्ताक्षर गरिसकेको रुसी प्रशासन केन्द्र क्रेमलिनले पुष्टि गरेको छ । यसले मासिक पेन्सनलाई दोब्बर बनाएको छ ।

आइतबार युनाइटेड रसियाका अधिकारीहरूसँगको भेटमा पुटिनले यस वर्षको बढ्दो मुद्रास्फीतिका कारण पेन्सनरहरुलाई सबैभन्दा बढी असर परेको बताएका थिए ।

केन्द्रीय बैङ्कका अनुसार वार्षिक मुद्रास्फीति ६.५ प्रतिशत पुगेको छ । बैङ्कले जूनमा आफ्नो आधारभूत ब्याज दर सोही आँकडामा बढाएको थियो । यो सन् २०१४ को मुद्रा सङ्कट पछिको सबैभन्दा ठुलो वृद्धि हो । पुटिनले सैन्य कर्मचारीहरूलाई १५ हजार रुबल बोनस दिने प्रस्ताव गरिएको एक अर्को आदेशमा आइतबार हस्ताक्षर गरेका थिए ।

रुसी नेता पुटिनले सडक मर्मत, सार्वजनिक यातायात र आधारभूत संरचना तथा स्वास्थ्य सेवा विकास गर्न अरबौँ खर्च गर्ने एक महिना पहिले बताएका थिए । सरकारले अवकाशको उमेर हद बढाएको विवादास्पद पेन्सन सुधार योजना पारित गरेपछि सन् २०१८ मा युनाइटेड रसियाको ख्याति दरमा तीव्र कमी आउन थालेको थियो ।