काठमाडौं । अफगानिस्तानको काबुल विमानस्थल बाहिर भएका तीन श्रृंखलाबद्ध विस्फोटमा मृत्यु हुने बढिरहेका छन् । शुक्रबार बिहानसम्म ८० जनाको ज्यान गइसकेको छ । घटनामा परी दुई सय बढी घाइते भएका छन् ।
घाइतेमध्ये कयौंको अवस्था गम्भीर रहेको छ । बिहीबार बेलुकी भएको उक्त घटनामा १३ अमेरिकी सैनिकको पनि ज्यान गएको छ । अमेरिकी पत्रिका वाल स्ट्रिट जर्नलका अनुसार ८० जनाको ज्यान गएको छ भने दुई सय भन्दा बढी घाइते छन् ।
अमेरिकी सेन्ट्रल कमान्ड जनरल क्यानेथ म्याकेन्जीका अनुसार १५ अमेरिकी घाइते भएका छन् । इस्लामिक आतंकवादीहरुबाट विष्फोट गराइएको बताइएको छ । दारुलअमन इलाकामा भारती गोलीबारी भएको समेत जनाइएको छ ।
विमानस्थल बाहिर तीन संदिग्धलाई देखिएको समेत बताइएको छ । यीमध्ये दुई जना आत्मघाती विष्फोटकारी (सुसाइड बम्बर) रहेको पनि जनाइएको छ ।
अफनिस्तानमा तालिबानले सत्ता कब्जा गरेपछि देश छोड्न काबुल विमानस्थल आसपास भेला भएको भिडलाई लक्षित गरी विस्फोट गराइएको थियो । विष्फोटको तालिबानले निन्दा गरेको छ ।
विस्फोटमा केही तालिबान लडाकुहरू पनि घाइते भएको जनाइएको छ ।
यता अमेरिकी राष्ट्रपति जो बाइडेनले काबुल विमानस्थल बाहिर बम हमला गरिएपनि त्यहाँबाट अमेरिकी तथा अन्य नागरिकको उद्धार कार्य नरोकिने जनाएका छन् ।
अमेरिकी कमान्ड जनरल म्याकेन्जीका अनुसार हाल ५ हजार मानिसहरु काबुल एयरपोर्टमा रहेका छन् । उनीहरु फ्लाइटको पर्खाइमा रहेका छन् ।
१४ अगष्टदेखि अहिलेसम्म एक लाख ४ हजार नागरिकले अफगानिस्तान छाडिसकेका छन् । जसमा ६६ हजार अमेरिकी र ३७ हजार सहयोगी देशका नागरिक हुन् ।
