बाढी पहिरो प्रभावितका लागि भारतद्वारा राहत सामाग्री हस्तान्तरण

हाम्रा कुरा

प्रकाशित २०७८ भदौ ११ शुक्रबार

काठमाडौँ । मिसन उप-प्रमुख श्रीमती नामग्या खम्पाले भारत सरकारको तर्फबाट आठ करोड बराबरको राहत सामाग्री हस्तान्तरण गरेकी छन् । शुक्रवार नेपाल–भारत महिला मैत्री समाजकी अध्यक्ष तथा सांसद चन्दा चौधरी र प्राज्ञिक विद्यार्थी परिषद्का अध्यक्ष नारायण ढकाललाई खम्पाले सो सामाग्री हस्तान्तरण गरेकी हुन् ।

नेपालका १५ जिल्लाहरूमा बाढी तथा पहिरोबाट प्रभावित परिवारहरूका लागि वितरण गर्न लागिएको सो राहत सामग्रीमा टेन्ट, प्लास्टिक सिट, स्लीपिङ्ग म्याट र औषधिहरू रहेका छन्।

बाढी र पहिरोका कारण जनजीवनमा पुगेको क्षतिलाई दृष्टिगत गर्दै स्थानीय सरकारसँगको समन्वयमा नेपाल–भारत महिला मैत्री समाज र प्राज्ञिक विद्यार्थी परिषद्मार्फत सो राहत सामाग्री चार प्रदेशका पर्सा, बारा, रौतहट, सर्लाही, धनुषा, महोत्तरी, सिराहा, सप्तरी, रुपन्देही, गोरखा, मनाङ, सिन्धुपाल्चोक, रसुवा, दोलखा र धादिङ जिल्लामा वितरण गरिनेछ।