साउदीमा स्कुल खुल्यो, १२ वर्षभन्दा बढी उमेरकाबाट सुरु

रासस-सिन्ह्वा

प्रकाशित २०७८ भदौ १४ सोमबार

रियाद। लामो समयदेखि विद्यालय जान नपाएका साउदी अरबका विद्यार्थीहरु आइतबारदेखि विद्यालय जान थालेका छन् ।अनलाइनमार्फत बढिरहेका विद्यार्थीहरु अहिले भने भौतिकरुपमै विद्यालय उपस्थित भएर अध्ययन गर्न थालेका हुन् । योसँगै नयाँ शैक्षिकसत्रसमेत सुरु भएको जनाइएको छ ।

गत १७ महिनादेखि घरमै पढिरहेका ती विद्यार्थीहरू विद्यालय गएर पढ्न पाएपछि खुसी व्यक्त गरेका छन् । घरमै बसेर अनलाइनमार्फत भइरहेको पढाइमा गुणस्तर नभएपछि र कोरोना भाइरसको महामारी पनि कम हुँदै गएपछि भौतिकरुपमै अध्ययन अध्यापन सुरु गरिएको हो ।

शैक्षिक अधिकारीहरूका अनुसार अहिले १२ वर्ष पूरा भएका वा सोभन्दा बढी उमेरका बालबालिकालाई मात्रै विद्यालय आउन दिने व्यवस्था गरिएको छ ।

प्राथमिक विद्यालय तह र पूर्वप्राथमिक तहका विद्यार्थीहरुलाई भने अझै पनि विद्यालय आउन अनुमति दिइएको छैन ।

“कोरोना भाइरसविरुद्धको खोपको पूर्ण मात्रा नलगाएको र १२ वर्षभन्दा कम उमेरका व्यक्तिहरूलाई विद्यालय अझै पनि खुला गरिएको छैन”, एक अधिकारीले भने ।

उनीहरूलाई नयाँ शैक्षिक सत्रमा पनि अनलाइनमार्फत नै अध्यापन गराइने अधिकारीहरूले जानकारी दिएका छन् । भौतिक उपस्थितिमै भइरहेका अध्ययन अध्यापनको कार्यको उप शिक्षामन्त्री साद बिन साउद अल फहिदले कतिपय विद्यालयहरूमा स्थलगत अवलोकन पनि गरेका छन् ।

उनीहरूको स्वास्थ्य सुरक्षाको सुनिश्चितता हुने गरी उच्च सतर्कता अपनाउन उहाँले सबैलाई निर्देशन दिएका छन् ।

“हामीले सवै विद्यालयहरुलाई नजिकबाट निकालिरहेका छौँ, विद्यार्थीहरूको सुरक्षाको अवस्था र विद्यालयको व्यवस्थापनका बारेमा हाम्रो चासो छ”, उनले भने ।

विद्यालयमा विद्यार्थीहरूको प्रवेश, बस्ने व्यवस्था, बाहिरिने व्यवस्थालगायतमा विशेष ध्यान दिन सरकारी अधिकारीहरूले आग्रह गरेका छन् ।

विद्यालयका सबै गतिविधिमा सामाजिक दूरी कायम गर्न, मास्कको प्रयोग गर्न पनि विद्यार्थी, शिक्षक तथा कर्मचारीहरूलाई विशेष सतर्क गराइएको छ ।