- सुन चाँदी दर
- विनिमय दर
- नेपाली पात्रो
- राशिफल
काठमाडौं । साथीको हत्या आरोपमा पक्राउ परेका सैनिक जवान गंगाधर ढकाललाई सैनिक अदालतले जन्मकैदको फैसला गरेको छ । नेपाली सेनाको समरी जनरल सैनिक अदालतले बुधबार महेन्द्र दल गणमा कार्यरत सैनिक जवान ढकाललाई २५ वर्ष कैद सजाय सुनाएको हो ।
नेपाली सेनाका सहायकरथीसमेत रहेका सैनिक प्रवक्ता सन्तोषबल्लभ पौड्यालले सैनिक अदालतले ढकाललाई २५ वर्ष कैद सजाय सुनाएको जानकारी दिए । फैसलामा उनलाई भविष्यमा सरकारी सेवामासमेत अयोग्य ठहरिने भनिएको छ ।
महेन्द्र दल गणमा नै कार्यरत आफ्नै साथी हुद्दा भरत गुरुङको हत्या गरेको भन्दै प्रहरीले उनलाई ७ साउनमा चितवनको टाँडीबाट पक्राउ गरेको थियो ।
गुरुङको शव चितवनको भरतपुर महानगरपालिका १७ सिमलडाँडा खेतको नहरमा भेटिएको थियो । प्रहरी अनुसन्धानले कालिबहादुर गणबाट चोरिएको सट मेशिन गन ‘एसएमजी’ प्रयोग गरेर गुरुङको हत्या गरेको देखाएको थियो ।
सो हतियार चोरेको आरोपमा २८ महिनादेखि जेलमा रहेका कालिबहादुर गणका अमल्दार लव कुमार गुरुङ र जवान सरोज तामाङबारे भने फैसला आउन बाँकी छ ।